Slovakiya g‘arbidagi Nitra shahrida sodir bo‘lgan yo‘l transport hodisasi oqibatida 12 nafar yo‘lovchi, jumladan to‘rt nafar bola hayotdan ko‘z yumdi. Avtobus va yuk mashinasi to‘qnashuvida jarohat olgan 17 nafar odam shifoxonalarga olib ketilgan. Bu haqda Slovakiya respublikasi tibbiy tezkor xizmat ko‘rsatish markazi vakili Yozef Minar ma’lum qilgan.
Avvalroq Frans Press nashri yong‘in xavfsizligi xizmati axborotiga asoslanib avtohalokatda 13 nafar odamning halok bo‘lgani va 20 nafar yo‘lovchining jarohatlanganini xabar qilgan.
“Avtobus hamda yuk mashinasi to‘qnashuvida 12 nafar odam, jumladan 4 nafar bola halok bo‘lgan. Qolgan 17 nafar yo‘lovchi jarohatlangan. Ushbu raqamlar yana o‘sishi mumkin. Transport hodisasi sodir bo‘lgan joyda shifokorlar, o‘t o‘chiruvchilar va politsiya xodimlari ishlamoqda”, — deya ta’kidlagan Minar.
Avval Saudiya Arabistonida avtobusning yuk mashinasi bilan to‘qnashuvidan keyin sodir bo‘lgan yong‘inda 36 nafar ziyoratchi, Nepalda daryoga qulagan avtobusda 15 nafar yo‘lovchi hamda Peruda quyuq tuman sharoitida avtobusning jarlikka qulashi oqibatida 19 nafar odamning halok bo‘lgani haqida xabarlar berilgan. Shuningdek, 8-noyabrda Toshkent viloyatida ikkita Isuzu avtobusi ishtirokidagi avtohalokat tafsilotlari haqida ham yozilgan.
Izoh (0)