Tojikiston prezidenti Emomali Rahmon 29-noyabrda Toshkentda o‘tadigan Markaziy Osiyo davlatlari rahbarlarining mintaqadagi muammolar muhokamasiga bag‘ishlangan norasmiy sammitida ishtirok etadi. Bu haqda “Asia-Plus” nashri Tojikiston hukumatidagi o‘z manbalariga tayanib xabar qildi.
Uchrashuvda mintaqadagi davlatlar o‘rtasidagi savdo-iqtisodiy, transport-kommunikatsiya va ijtimoiy-madaniy sohalar bo‘yicha hamkorlik muhokama qilinadi.
Prezidentlar mintaqada xavfsizlik va barqarorlikni ta’minlash, Afg‘oniston hududida tinchlik o‘rnatish masalalari haqida fikr almashadi.Xabarda mintaqa yetakchilarining norasmiy sammitini Toshkentda o‘tkazish dastlab 12-aprelga rejalashtirilgani, lekin prezidentlarning roziligi asosida ushbu sana o‘zgargani ham qayd etilgan.
Norasmiy formatda uchrashuvlarni tez-tez o‘tkazish tashabbusi 2018-yil mart oyida Nur-Sulton (Ostona) shahrida o‘tgan birinchi sammitda O‘zbekiston Prezidenti Shavkat Mirziyoyev tomonidan ilgari surilgan. Shavkat Mirziyoyev har yili Navro‘z bayrami arafasida uchrashuv o‘tkazishni taklif qilib, mintaqa davlat rahbarlarini 2019-yilda Toshkentda o‘tadigan ikkinchi norasmiy sammitga chaqirgandi.
2018-yil 15-martda o‘tkazilgan mintaqa davlatlari yetakchilarining birinchi maslahatlashuv uchrashuvida O‘zbekiston Prezidenti Shavkat Mirziyoyev, Qozog‘istonning birinchi prezidenti Nursulton Nazarboyev, Qirg‘iziston prezidenti Sooronbay Jeenbekov, Tojikiston prezidenti Emomali Rahmon va Turkmaniston Majlisi raisi Akja Nurberdiyeva ishtirok etgan.
Izoh (0)