Қирғизистон қишлоқ хўжалиги вазирлиги Ўзбекистондан маҳсулот олиб келишни тақиқламоқчи

Қирғизистон Республикаси қишоқ хўжалиги, озиқ-овқат саноати ва мелиорация вазирлиги мамлакатга Ўзбекистон ҳудудидан айрим маҳсулотларни олиб кириш тақиқланиши мумкинлигини билдирди. Бу ҳақда Sputnik хабар берди.

Вазирлик маълумотига кўра, йил бошидан бери Евросиё иқтисодий иттифоқи талабларига кўра Ўзбекистондан келган юкларни текшириш вақтида 356 та қоида бузилиш ҳолати кузатилган, жумладан, 10 та ҳолатда зарарланган маҳсулотларни Қирғизистонга олиб киришга уринилган.

Ўзбекистондан олиб кирилаётган анорларда Шарқ куя капалаги топилган. Куя анор, шафтоли, ўрик, олхўри, нектарин, олма, нок, беҳи, олча, дафна, гилос, бодом мевалари орасида кузатилган. Ушбу ҳашарот меванинг 40 дан 100 фоизгача бўлган қисмини йўқ қилиши мумкин.

Sputnik’нинг хабар беришича, ушбу маҳсулотлар Қирғизистон чегарасидан Ўзбекистон Республикасида ўсимликлар карантини хизмати ваколатли органи томонидан берилган фитосанитар сертификати билан ўтказилган.

12 ноябрда «Достук» чегара постида 35 тонна хурмо, беҳи ва нўхатнинг фитосанитар сертификат, қадоқланган белгисиз Қирғистонга олиб киришга уриниш ҳолати фош этилганди.

«Евросиё иқтисодий иттифоқи талаблари ва Қирғизистон қонунчилигига кўра карантин назорати остида Ўзбекистондан мамлакатга олиб келинган маҳсулотларда сифат бузилиши ҳолатлари кузатилса, ушбу товарларнинг Қирғизистонга олиб кирилиши вақтинча тақиқланиши мумкин», — дейилади вазирлик хабарида.

Қирғизистон Республикаси қишоқ хўжалиги, озиқ-овқат саноати ва мелиорация вазирлиги Ўзбекистон қонунчилигига кўра ўсимликлар карантини хизмати ваколатли органига тегишли хат билан мурожаат қилган.