Farg‘ona viloyatining chegara hududida yuziga qora niqob taqqan va chegarachilar deb taxmin qilingan qurolli shaxslar bir o‘smirni urayotgani aks etgan video tarqaldi. Davlat xavfsizlik xizmati Chegara qo‘shinlari ushbu holat yuzasidan bayonot berdi. Aytishlaricha, kaltak yeganlar (chegarachilar bir emas, ikki kishini do‘pposlagan) harbiy xizmatchilarni bosib ketmoqchi bo‘lgan; qo‘shimcha qilishlaricha, “ular o‘zi kontrabandist, avval ham chegarani bir necha bor buzgan”.
Xonanda Lola “Sevgingni menga ayt” qo‘shig‘iga ishlangan ikkinchi klipi bilan 13-noyabr kuni O‘znetni portlatdi. Lola bitta klip bilan jamiyatdagi ko‘plab bahsli masalalar — ijodiy faoliyat ustidan nazorat qilishga urinishlar, shubhali taqiqlar, mantiqsiz tashabbuslar va yangiliklarga nisbatan toqatsizlik ustidan kulgan. Klipni ko‘rish qat’iy tavsiya etiladi (agar, mabodo, klip yoqmasa, kanalizatsiya quvurlariga shippak urib, musiqa yaratayotgan o‘zbekistonlik yigitlarning chiqishini tomosha qiling).
XDP vakili Ulug‘bek Inoyatovning 5 kishilik oilaga 2,5 mln so‘m oylik yetarli degan gapiga izoh berdi. Yodingizda bo‘lsa, bir necha kun avval Xalq demokratik partiyasi yetakchisi “Toshkentda besh kishilik oilaga bir boquvchi topayotgan 2,5 million so‘mlik bemalol yetadi”, deb “qovun tushirgan” va ijtimoiy tarmoqlar “yulduzi”ga aylangan edi. Partiya faolining bugun izoh berishicha, partiya yetakchisi 2,5 million so‘m haqida gapirganida barcha xarajatlarni nazarda tutmagan. Hay, mayli.
Tayinlovlar. Prezident qaroriga muvofiq, Bahodir Shermuhamedov oliy va o‘rta maxsus ta’lim vazirining yoshlar, ma’naviyat va ma’rifat masalalari bo‘yicha o‘rinbosari etib tayinlandi — u bungacha Prezident administratsiyasida milliy qadriyatlar, ma’naviyat va ma’rifatni o‘rganish hamda rivojlantirish sho‘basida ishlab kelayotgan edi. 29 yoshli Olimjon To‘ychiyev esa innovatsion rivojlanish vaziri o‘rinbosariga aylandi.
“Masalani siyosiylashtirmaslik kerak” — Davlatnazar Ro‘zmetov o‘limi bo‘yicha voqealar xronologiyasi keltirildi. Komil Allamjonov esa Nafosat Olloshukurova va Davlatnazar Ro‘zmetov bilan bog‘liq voqealarga munosabat bildirdi. Xullas, har xil shubhali xayollara bormanglar, hayotda shunaqa ko‘ngilsiz voqealar o‘zidan o‘zi ham bo‘lib turadi, deyishyapti. Okey.
O‘zbekiston bilan bog‘liq yana qanday yangiliklar bor? Samarqandda homilador xotinini bo‘g‘ib o‘ldirgan er o‘z joniga qasd qildi. Talabalar uchun qishki ta’til muddati o‘zgarishi mumkin. Mamlakatdan eng ko‘p qaysi millatga mansub kishilar ko‘chib ketayotgani aniqlandi. Toshkentda “Minor” masjidi imomi o‘zgardi. “Prokuratura to‘g‘risida”gi qonunga o‘zgartirishlar kiritildi, Milliy gvardiya to‘g‘risidagi qonun esa deputatlar tomonidan qabul qilindi. SSSR pasporti bilan yurgan buvaydalik otaxonga biometrik pasport beriladi. Soxta “001 VIP” avtoraqamini yasattirgan fuqaro 707 avtoraqamini yasab berish uchun buyurtmachidan 150 dollar pul olayotganida qo‘lga olindi. O‘zbekistonda qidiruvda bo‘lgan ayol Rossiyadagi tug‘ruqxonada ko‘zi yoriyotganida ushlandi.
Dunyo-chi, tinchmi? Erdo‘g‘on Tramp bilan AQSh Suriya bo‘yicha kelishuvda bajarmagan majburiyatlarni muhokama qiladi. Senator-demokrat Janun Anyes Boliviyada prezident vazifasini bajaradi. Isroil G‘azo sektoriga bergan havo zarbalari oqibatida 20 nafardan ortiq falastinlik halok bo‘ldi. Moldovada parlament mamlakat hukumatini iste’foga chiqardi. Uzoq davom etgan yomg‘irlar sabab Venetsiyada suv toshdi. Hindistondagi qurilishda uyqudagi erkak tiriklayin ko‘mib yuborildi. Plagiatda ayblangan Qozog‘iston maorif va ilm-fan vaziri o‘rinbosari lavozimidan ozod etildi.
Sport yangiliklari. Futbol bo‘yicha O‘zbekiston milliy terma jamoasi bosh murabbiyi Vadim Abramov Saudiya Arabistoniga qarshi o‘yin oldidan “g‘alaba qozonishdan umidvor”ligini aytdi. Milliy terma jamoaning asosiy hujumchisi Eldor Shomurodov esa yanvardayoq hozirgi klubi — “Rostov”ni tark etishi mumkinligi aytilmoqda. Avvalroq unga Germaniyaning “Shtutgart” va Rossiyaning SSKA klublari qiziqayotgani haqida xabar berilgan edi.
Izoh (0)