“Don, un va non yetkazib berish tizimiga bozor mexanizmlarini to‘liq joriy etish chora-tadbirlari to‘g‘risida”gi hukumatning 2019-yil 14-oktabrdagi qaroriga asosan un narxini davlat tomonidan nazorat qilish to‘xtatildi. Shu bilan birga, fuqarolarni ushbu amaliyotning keskin ta’sirlaridan saqlash va ijtimoiy himoyani kuchaytirish maqsadida 2019-yil 1-oktabrdan un va qolipli non xarid qilish bo‘yicha qo‘shimcha xarajatlarni qoplash uchun har oylik pul kompensatsiyasi 22 300 so‘mdan 50 000 so‘mga oshirildi.
Pensiya jamg‘armasi matbuot xizmatining “Daryo”ga ma’lum qilishicha, respublika bo‘yicha jami 1,7 million nafar fuqaroga to‘lanayotgan pul kompensatsiyasi miqdori oshirildi. Shuningdek, pul kompensatsiyasi oluvchi toifalar soni 2 taga ko‘payib, 11 toifaga yetkazildi, 1-oktabrdan boshlab qo‘shimcha ravishda 64,9 ming nafar fuqaro hamda 218,1 mingta oilaga ilk marotaba pul kompensatsiyasi joriy qilindi.
Pensiya jamg‘armasi orqali pul kompensatsiyasi oluvchilar soni 1,4 million nafarni tashkil etdi. Mahalla fuqarolar yig‘inlari orqali pul kompensatsiyasi oluvchilar soni 514,4 ming nafarni tashkil etmoqda.
Natijada bugungi kunga kelib pul kompensatsiya oluvchi aholi qatoriga qo‘shimcha ravishda ikki toifa qo‘shilishi natijasida pul kompensatsiyasi oluvchilari soni 18,5 foizga oshib, 2 million nafarni tashkil etmoqda.
Qarorga muvofiq, pul kompensatsiyalari pensiya va nafaqa to‘lovlari bilan bir vaqtda amalga oshirilmoqda.
Moliya vazirligi tomonidan shu yilning oktabr—dekabr oylarida pul kompensatsiyalarini yangi miqdorlarda to‘lash uchun, qo‘shimcha tarzda 189 milliard so‘m miqdorida mablag‘ ajratildi. (Shulardan Pensiya jamg‘armasi tomonidan tayinlangan pensiya va nafaqa oluvchilari uchun 125 milliard so‘m va mahallalar tomonidan tayinlanadigan nafaqalar va moddiy yordam oluvchilar uchun 64 milliard so‘m).
Umumiy hisobda non kompensatsiyalari to‘lovi uchun 2019-yilda respublika budjeti hisobidan 604 milliard so‘m ajratilgan.
Eslatib o‘tamiz, O‘zbekistonda “buxanka” narxi so‘nggi 20 kun ichida ikkinchi marta qimmatlashdi. Ayrim hududlarda uning narxi 2500 so‘mgacha ko‘tarildi. Shavkat Mirziyoyev 7-noyabr kuni o‘tkazilgan videoselektorda shu masalaga alohida to‘xtalib, non ishlab chiqarish tannarxini kamaytirish bo‘yicha ko‘rsatmalar berdi. Shundan so‘ng Qoraqalpog‘istonda non narxi nazoratga olinib, 1500 so‘mdan sotila boshlandi.
Izoh (0)