Фарғона вилоятининг чегара ҳудудида юзига қора ниқоб таққан ва чегарачилар деб тахмин қилинган қуролли шахслар бир ўсмирни ураётгани акс этган видео тарқалди. Давлат хавфсизлик хизмати Чегара қўшинлари ушбу ҳолат юзасидан баёнот берди. Айтишларича, калтак еганлар (чегарачилар бир эмас, икки кишини дўппослаган) ҳарбий хизматчиларни босиб кетмоқчи бўлган; қўшимча қилишларича, «улар ўзи контрабандист, аввал ҳам чегарани бир неча бор бузган».
Хонанда Лола «Севгингни менга айт» қўшиғига ишланган иккинчи клипи билан 13 ноябрь куни Ўзнетни портлатди. Лола битта клип билан жамиятдаги кўплаб баҳсли масалалар — ижодий фаолият устидан назорат қилишга уринишлар, шубҳали тақиқлар, мантиқсиз ташаббуслар ва янгиликларга нисбатан тоқатсизлик устидан кулган. Клипни кўриш қатъий тавсия этилади (агар, мабодо, клип ёқмаса, канализация қувурларига шиппак уриб, мусиқа яратаётган ўзбекистонлик йигитларнинг чиқишини томоша қилинг).
ХДП вакили Улуғбек Иноятовнинг 5 кишилик оилага 2,5 млн сўм ойлик етарли деган гапига изоҳ берди. Ёдингизда бўлса, бир неча кун аввал Халқ демократик партияси етакчиси «Тошкентда беш кишилик оилага бир боқувчи топаётган 2,5 миллион сўмлик бемалол етади», деб «қовун туширган» ва ижтимоий тармоқлар «юлдузи»га айланган эди. Партия фаолининг бугун изоҳ беришича, партия етакчиси 2,5 миллион сўм ҳақида гапирганида барча харажатларни назарда тутмаган. Ҳай, майли.
Тайинловлар. Президент қарорига мувофиқ, Баҳодир Шермуҳамедов олий ва ўрта махсус таълим вазирининг ёшлар, маънавият ва маърифат масалалари бўйича ўринбосари этиб тайинланди — у бунгача Президент администрациясида миллий қадриятлар, маънавият ва маърифатни ўрганиш ҳамда ривожлантириш шўбасида ишлаб келаётган эди. 29 ёшли Олимжон Тўйчиев эса инновацион ривожланиш вазири ўринбосарига айланди.
«Масалани сиёсийлаштирмаслик керак» — Давлатназар Рўзметов ўлими бўйича воқеалар хронологияси келтирилди. Комил Алламжонов эса Нафосат Оллошукурова ва Давлатназар Рўзметов билан боғлиқ воқеаларга муносабат билдирди. Хуллас, ҳар хил шубҳали хаёллара борманглар, ҳаётда шунақа кўнгилсиз воқеалар ўзидан ўзи ҳам бўлиб туради, дейишяпти. Окей.
Ўзбекистон билан боғлиқ яна қандай янгиликлар бор? Самарқандда ҳомиладор хотинини бўғиб ўлдирган эр ўз жонига қасд қилди. Талабалар учун қишки таътил муддати ўзгариши мумкин. Мамлакатдан энг кўп қайси миллатга мансуб кишилар кўчиб кетаётгани аниқланди. Тошкентда «Минор» масжиди имоми ўзгарди. «Прокуратура тўғрисида»ги қонунга ўзгартиришлар киритилди, Миллий гвардия тўғрисидаги қонун эса депутатлар томонидан қабул қилинди. СССР паспорти билан юрган бувайдалик отахонга биометрик паспорт берилади. Сохта «001 VIP» авторақамини ясаттирган фуқаро 707 авторақамини ясаб бериш учун буюртмачидан 150 доллар пул олаётганида қўлга олинди. Ўзбекистонда қидирувда бўлган аёл Россиядаги туғруқхонада кўзи ёриётганида ушланди.
Дунё-чи, тинчми? Эрдўғон Трамп билан АҚШ Сурия бўйича келишувда бажармаган мажбуриятларни муҳокама қилади. Сенатор-демократ Жанун Анес Боливияда президент вазифасини бажаради. Исроил Ғазо секторига берган ҳаво зарбалари оқибатида 20 нафардан ортиқ фаластинлик ҳалок бўлди. Молдовада парламент мамлакат ҳукуматини истеъфога чиқарди. Узоқ давом этган ёмғирлар сабаб Венецияда сув тошди. Ҳиндистондаги қурилишда уйқудаги эркак тириклайин кўмиб юборилди. Плагиатда айбланган Қозоғистон маориф ва илм-фан вазири ўринбосари лавозимидан озод этилди.
Спорт янгиликлари. Футбол бўйича Ўзбекистон миллий терма жамоаси бош мураббийи Вадим Абрамов Саудия Арабистонига қарши ўйин олдидан «ғалаба қозонишдан умидвор»лигини айтди. Миллий терма жамоанинг асосий ҳужумчиси Элдор Шомуродов эса январдаёқ ҳозирги клуби — «Ростов»ни тарк этиши мумкинлиги айтилмоқда. Аввалроқ унга Германиянинг «Штутгарт» ва Россиянинг ЦСКА клублари қизиқаётгани ҳақида хабар берилган эди.
Изоҳ (0)