O‘zbekistonda madaniy meros obyektlariga muhofaza belgilarini o‘rnatish bo‘yicha 2019 yilning dastlabki to‘qqiz oyi davomida bajarilishi belgilangan vazifalarning faqat yarmi bajarilgan. Bu haqda madaniyat vaziri o‘rinbosari Kamola Oqilova ma’lum qildi, deya xabar bermoqda “Daryo” muxbiri Musulmonbek Ibrohimov.
Prezident farmoni bilan madaniy meros obyektlarining manzilli ro‘yxatini tuzish, moliyalashtirish manbasini belgilash, yil davomida 5 430 ta obyektning kadastr hujjatlarini rasmiylashtirish, yagona davlat kadastr tizimiga ma’lumotlarni kiritish, 159 ta obyektda elektron turniket o‘rnatish, 5 953 ta obyektda muhofaza belgilarini o‘rnatish belgilangan. 5 430 ta obyektlarning manzilli ro‘yxati tuzilgan. Hukumatning 2019-yil 30-martdagi qarori bilan kadastr hujjatlarini rasmiylashtirish bo‘yicha moliyalashtirish manbalari belgilangan.
Kamola Oqilovaning so‘zlariga ko‘ra, 2019-yilning dastlabki to‘qqiz oyida 5 212 ta — 63,5 foiz obyektning kadastr hujjatlari rasmiylashtirilgan, xolos. Shuningdek, 2 276 ta madaniy meros obyektlariga, aniqrog‘i, yarmiga muhofaza belgilari o‘rnatilgan.
“Kadastr hujjatlarini rasmiylashtirish, muhofaza belgilari , turniketlarni o‘rnatish uchun mahalliy budjetdan mablag‘ ajratilishi kerak. Afsuski, bu bizda eng muammoli yo‘nalish, deyish mumkin. Aksariyat bajarilmagan topshiriqlar mana shu moliyaviy muammoga borib taqalmoqda”, — dedi madaniyat vaziri o‘rinbosari.
Ma’lumot uchun, Vazirlar Mahkamasining 2019-yil 4-oktyabrdagi “Moddiy madaniy merosning ko‘chmas mulk obyektlari milliy ro‘yxatini tasdiqlash to‘g‘risida” qarori bilan madaniy meros obyektlarining milliy ro‘yxati tasdiqlanib, unga 8 208 ta obyekt kiritilgan.
Izoh (0)