Ўзбекистонда маданий мерос объектларининг кадастр ҳужжатларини расмийлаштириш учун маҳаллий бюджетдан маблағ ажратиш — энг катта муаммо

Ўзбекистонда маданий мерос объектларига муҳофаза белгиларини ўрнатиш бўйича 2019 йилнинг дастлабки тўққиз ойи давомида бажарилиши белгиланган вазифаларнинг фақат ярми бажарилган. Бу ҳақда маданият вазири ўринбосари Камола Оқилова маълум қилди, дея хабар бермоқда «Дарё» мухбири Мусулмонбек Иброҳимов.

Президент фармони билан маданий мерос объектларининг манзилли рўйхатини тузиш, молиялаштириш манбасини белгилаш, йил давомида 5 430 та объектнинг кадастр ҳужжатларини расмийлаштириш, ягона давлат кадастр тизимига маълумотларни киритиш, 159 та объектда электрон турникет ўрнатиш, 5 953 та объектда муҳофаза белгиларини ўрнатиш белгиланган. 5 430 та объектларнинг манзилли рўйхати тузилган. Ҳукуматнинг 2019 йил 30 мартдаги қарори билан кадастр ҳужжатларини расмийлаштириш бўйича молиялаштириш манбалари белгиланган.

Камола Оқилованинг сўзларига кўра, 2019 йилнинг дастлабки тўққиз ойида 5 212 та — 63,5 фоиз объектнинг кадастр ҳужжатлари расмийлаштирилган, холос. Шунингдек, 2 276 та маданий мерос объектларига, аниқроғи, ярмига муҳофаза белгилари ўрнатилган.

«Кадастр ҳужжатларини расмийлаштириш, муҳофаза белгилари , турникетларни ўрнатиш учун маҳаллий бюджетдан маблағ ажратилиши керак. Афсуски, бу бизда энг муаммоли йўналиш, дейиш мумкин. Аксарият бажарилмаган топшириқлар мана шу молиявий муаммога бориб тақалмоқда», — деди маданият вазири ўринбосари.

Маълумот учун, Вазирлар Маҳкамасининг 2019 йил 4-октябрдаги «Моддий маданий мероснинг кўчмас мулк объектлари миллий рўйхатини тасдиқлаш тўғрисида» қарори билан маданий мерос объектларининг миллий рўйхати тасдиқланиб, унга 8 208 та объект киритилган.