Rishtonda ikki qiz is gazidan zaharlanib, hammomda vafot etdi. Bu O‘zbekistonda sovuq kunlar boshlanganidan beri rasman oshkor qilingan 11 va 12-qurbon. Bungacha Yangiariqda to‘rt kishi, Qo‘qonda uch kishi, Samarqandda bir kishi, Nukusda esa ikki kishi is gazidan zaharlanib, o‘lgan edi.
Abdugappor Kirgizbayev Vazirlar Mahkamasidagi Davlat tilini rivojlantirish departamenti mudiri etib tayinlandi. Bu xabarga jamoatchilikning kinoyali munosabati o‘zini uzoq kuttirib qo‘ygani yo‘q, taxminan mana shunday chorlovlar yangramoqda: “Janob Kirgizbayev davlat tilini rivojlantirishni o‘z ismi-sharifini davlat tiliga moslashtirishdan boshlasin”.
Senator Maqsuda Vorisova “Milliy tiklanish” gazetasini sudga berishi mumkin (lekin bermasligi ham mumkin — sud hukmi chiqqunicha saylov o‘tib ketadi-ku). Muammo nimada desangiz, O‘zLiDeP muassisligida chiqqan gazetaning sobiq bosh muharriri nazorati ostida chiqayotgan “Milliy tiklanish” gazetasida senator Rossiya kommunistlari yetakchisi Gennadiy Zyuganovning “qarindoshi”ga chiqarilibdi. Nachora — so‘z erkinligi!
Andijon hokimi “Ravon mingim kelyapti, paxta tergim kelyapti” deb she’r o‘qigan shoirga Nexia sovg‘a qildi. Shoirning aytishicha, u Andijonga hokimning qo‘lidan mashina olish niyatida borgan va niyatiga yetgan. Hokimning qo‘shimcha qilishicha, mashina uning cho‘ntagidan emas, balki andijonlik homiylar hisobidan sovg‘a qilingan.
Toshkentda hokimlik vakillari Abdulla Aripov va Jahongir Ortiqxo‘jayev imzosini qalbakilashtirib yarim million dollarni qo‘lga kiritgani aniqlandi. Allaqachon sudlangan bu shaxslar orasida Chilonzor tumani hokimligi qurilish bo‘lim boshlig‘i ham borligi aytilmoqda, yana ikki nafari ishsiz, bir nafari esa huquqshunos bo‘lgan.
Toshkentdan Chorvoqqa olib boruvchi yo‘llarga uyi va mashinasidan boshqa hammayoqni axlatxona deb o‘ylaydigan “muqobil idrokli” haydovchilar va ularning yo‘lovchilari uchun maxsus yo‘l belgilari o‘rnatilishi boshlanibdi. Belgining xalqona nomi shunday ekan: “Hoy, baraka topkur, qo‘lingdagi axlatni mana bu joyga tashla, hammayoqni axlat qilma, odam bo‘l”.
Toshkent bilan bog‘liq yana uchta xabar: Toshkentning yettita katta chorrahasiga “vafli chiziqlari” yotqizildi (tirbandliklarning oldini olish va kameralarga yordam berish uchun); Toshkentdagi elektrobuslar soni 10 taga yetkaziladi (hozircha bitta; qachonligi aytilmadi); . Toshkentda daydi mushuklar uchun uycha ochildi (mushuk do‘stdir odamga!).
Maosh va daromad haqida. Prezident Markaziy bank to‘g‘risidagi qonunning yangi tahririni imzoladi. Unga ko‘ra, Markaziy bank xodimlari endi haq to‘lanadigan boshqa turdagi faoliyat bilan shug‘ullanishi taqiqlandi (ilm bilan shug‘ullanish va dars berish davomida olingan daromadlar bundan mustasno). Buyoqda esa Davlat test markazi xodimlarining maoshi ikki yarim baravarga oshadigan bo‘lib turibdi.
O‘zbekistonda yana boshqa qanday yangiliklar bor? Markaziy Osiyo davlatlari rahbarlari 27-noyabr kuni Toshkentda yig‘iladi. Jizzaxda lo‘li millatiga mansub fuqarolar uchun 150 milliard so‘mga 780 ta uy qurib berildi. Buxoroda IIB xodimini haqoratlab, unin qo‘lidan jezlni tortib olgan fuqaro 10 oyga qamaldi. Samarqandda bir oy komada yotgan 48 yoshli ayol hayotga qaytarildi. O‘zbekiston xurmo eksporti bo‘yicha dunyoning yetakchi uchligidagi o‘rnini yo‘qotdi.
Jahonda-chi, jahonda nima gap? Kataloniya mustaqilligi tarafdorlari markaziy Ispaniya va Fransiyaga olib boradigan yo‘llarni to‘sib qo‘ydi. Hindistonda ochlikdan o‘lishni istamagan erkak atayin qamoqqa tushdi. Bashar Asadning qarindoshlari “Moskva-Siti”dan 19 ta ko‘chmas mulk xarid qilgan. Avstraliyada o‘rmon yong‘inlari 1 million gektarga yaqin maydonni qamrab oldi.
Jahon urushlari haqida. Italiyada Ikkinchi Jahon urushida o‘zbek askari ko‘rsatgan jasorat haqidagi kitob nashr etildi. “Daryo” kolumnistlari esa Birinchi Jahon urushi haqida maqola yozdi, o‘qishni tavsiya etamiz: “11-noyabr nega 9-may kabi nishonlanmaydi? Birinchi jahon urushining tugashi haqida”.
Izoh (0)