Mobil qurilmalarning IMEI kodlarini ro‘yxatdan o‘tkazish foydalanuvchilarning shaxsiy ma’lumotlarini yig‘ib, ularni kuzatishga sabab bo‘lmaydi. Bu haqda axborot texnologiyalari va kommunikatsiyalarini rivojlantirish vaziri o‘rinbosari Qahramon Yo‘ldoshev ma’lum qildi, deya xabar bermoqda “Daryo” muxbiri Musulmonbek Ibrohimov.
O‘zbekistonda 1-aprel mobil qurilmalarni IMEI kodi bo‘yicha avtomatik ravishda ro‘yxatga olish boshlangan. 17-sentyabr kuni hukumat tomonidan O‘zbekiston hududida foydalanilayotgan, sotish yoki shaxsiy foydalanish uchun olib kirilayotgan hamda ishlab chiqarilayotgan mobil uskunalarni ro‘yxatdan o‘tkazish tartibi tasdiqlangan. 1 aprelidan 1 noyabrga qadar 29 million dona mobil qurilma UzIMEI tizimida ro‘yxatdan o‘tkazilgan.
Hukumatning “O‘zbekiston Respublikasi hududida foydalanilayotgan, sotish yoki shaxsiy foydalanish uchun olib kelinadigan va ishlab chiqariladigan mobil qurilmalarni ro‘yxatdan o‘tkazish tartibi to‘g‘risida”gi qaroriga asosan, UzIMEI tizimidan Axborot texnologiyalari va kommunikatsiyalarini rivojlantirish, Ichki ishlar vazirliklari hamda Davlat bojxona qo‘mitasi hamkorlikda foydalanish bo‘yicha bitim tuzilgan.Hukumat tomonidan tasdiqlangan nizomga ko‘ra, 1-dekabrgacha barcha mobil uskunalar mobil aloqa operatorlarining tarmoqlariga ulanish orqali bepul, avtomatik ravishda ro‘yxatdan o‘tkaziladi. Ro‘yxatdan o‘tkazish bilan bog‘liq 1-dekabrdan kuchga kiradigan yangiliklar faqat import qiluvchilar va ishlab chiqaruvchilarga tegishli. Jismoniy shaxslar uchun hech narsa o‘zgarmaydi.Fuqaroga ma’lumot kerak bo‘lganida tizimdan foydalanish tartibi bitimda qayd etilgan. Operatorlarda fuqaroning shaxsiy ma’lumotlarini uchinchi shaxslarga berish vakolati yo‘q. Faqat bitimda ko‘rsatilgan reglament asosida ma’lumotlar almashinuvi yo‘lga qo‘yiladi.
Qahramon Yo‘ldoshev, axborot texnologiyalari va kommunikatsiyalarini rivojlantirish vaziri o‘rinbosari
Hozirgi kunda O‘zbekiston fuqarolari foydalanayotgan va roumingdagi uskunalar avtomatik ravishda ro‘yxatga olingan hamda qayta ro‘yxatga olinishi shart emas. 1-dekabrdan boshlab O‘zbekistonga yangi telefonlarni olib kirayotgan tadbirkorlar ro‘yxatdan o‘tkazish uchun mustaqil ravishda to‘lov kiritadi.
Avval foydalanilgan yoki yangi telefon sotib olayotgan jismoniy shaxslar xarid oldidan faqat IMEI kodining ro‘yxatga olinganligini aniqlashlari va uning maqomini www.uzimei.uz sayti orqali tekshirib olishlari kerak bo‘ladi. IMEI kodining ro‘yxatga olinishi uning egasining ismiga bog‘liq bo‘lmasligi sababli, telefon sotilishida hech qanday muammo tug‘ilmaydi — ushbu yangilik foydalanilgan uskunalarning oldi-sotdisiga hech qanday ta’sir ko‘rsatmaydi.
Izoh (0)