Мобил қурилмаларнинг IMEI кодларини рўйхатдан ўтказиш фойдаланувчиларнинг шахсий маълумотларини йиғиб, уларни кузатишга сабаб бўлмайди. Бу ҳақда ахборот технологиялари ва коммуникацияларини ривожлантириш вазири ўринбосари Қаҳрамон Йўлдошев маълум қилди, дея хабар бермоқда «Дарё» мухбири Мусулмонбек Иброҳимов.
Ўзбекистонда 1 апрель мобил қурилмаларни IMEI коди бўйича автоматик равишда рўйхатга олиш бошланган. 17-сентябр куни ҳукумат томонидан Ўзбекистон ҳудудида фойдаланилаётган, сотиш ёки шахсий фойдаланиш учун олиб кирилаётган ҳамда ишлаб чиқарилаётган мобил ускуналарни рўйхатдан ўтказиш тартиби тасдиқланган. 1 апрелидан 1 ноябрга қадар 29 миллион дона мобил қурилма UzIMEI тизимида рўйхатдан ўтказилган.
Ҳукуматнинг «Ўзбекистон Республикаси ҳудудида фойдаланилаётган, сотиш ёки шахсий фойдаланиш учун олиб келинадиган ва ишлаб чиқариладиган мобил қурилмаларни рўйхатдан ўтказиш тартиби тўғрисида»ги қарорига асосан, UzIMEI тизимидан Ахборот технологиялари ва коммуникацияларини ривожлантириш, Ички ишлар вазирликлари ҳамда Давлат божхона қўмитаси ҳамкорликда фойдаланиш бўйича битим тузилган.Ҳукумат томонидан тасдиқланган низомга кўра, 1 декабргача барча мобил ускуналар мобил алоқа операторларининг тармоқларига уланиш орқали бепул, автоматик равишда рўйхатдан ўтказилади. Рўйхатдан ўтказиш билан боғлиқ 1 декабрдан кучга кирадиган янгиликлар фақат импорт қилувчилар ва ишлаб чиқарувчиларга тегишли. Жисмоний шахслар учун ҳеч нарса ўзгармайди.Фуқарога маълумот керак бўлганида тизимдан фойдаланиш тартиби битимда қайд этилган. Операторларда фуқаронинг шахсий маълумотларини учинчи шахсларга бериш ваколати йўқ. Фақат битимда кўрсатилган регламент асосида маълумотлар алмашинуви йўлга қўйилади.
Қаҳрамон Йўлдошев, ахборот технологиялари ва коммуникацияларини ривожлантириш вазири ўринбосари
Ҳозирги кунда Ўзбекистон фуқаролари фойдаланаётган ва роумингдаги ускуналар автоматик равишда рўйхатга олинган ҳамда қайта рўйхатга олиниши шарт эмас. 1 декабрдан бошлаб Ўзбекистонга янги телефонларни олиб кираётган тадбиркорлар рўйхатдан ўтказиш учун мустақил равишда тўлов киритади.
Аввал фойдаланилган ёки янги телефон сотиб олаётган жисмоний шахслар харид олдидан фақат IMEI кодининг рўйхатга олинганлигини аниқлашлари ва унинг мақомини www.uzimei.uz сайти орқали текшириб олишлари керак бўлади. IMEI кодининг рўйхатга олиниши унинг эгасининг исмига боғлиқ бўлмаслиги сабабли, телефон сотилишида ҳеч қандай муаммо туғилмайди — ушбу янгилик фойдаланилган ускуналарнинг олди-сотдисига ҳеч қандай таъсир кўрсатмайди.
Изоҳ (0)