Риштонда икки қиз ис газидан заҳарланиб, ҳаммомда вафот этди. Бу Ўзбекистонда совуқ кунлар бошланганидан бери расман ошкор қилинган 11 ва 12-қурбон. Бунгача Янгиариқда тўрт киши, Қўқонда уч киши, Самарқандда бир киши, Нукусда эса икки киши ис газидан заҳарланиб, ўлган эди.
Абдугаппор Киргизбаев Вазирлар Маҳкамасидаги Давлат тилини ривожлантириш департаменти мудири этиб тайинланди. Бу хабарга жамоатчиликнинг кинояли муносабати ўзини узоқ куттириб қўйгани йўқ, тахминан мана шундай чорловлар янграмоқда: «Жаноб Киргизбаев давлат тилини ривожлантиришни ўз исми-шарифини давлат тилига мослаштиришдан бошласин».
Сенатор Мақсуда Ворисова «Миллий тикланиш» газетасини судга бериши мумкин (лекин бермаслиги ҳам мумкин — суд ҳукми чиққунича сайлов ўтиб кетади-ку). Муаммо нимада десангиз, ЎзЛиДеП муассислигида чиққан газетанинг собиқ бош муҳаррири назорати остида чиқаётган «Миллий тикланиш» газетасида сенатор Россия коммунистлари етакчиси Геннадий Зюгановнинг «қариндоши»га чиқарилибди. Начора — сўз эркинлиги!
Андижон ҳокими «Ravon мингим келяпти, пахта тергим келяпти» деб шеър ўқиган шоирга Nexia совға қилди. Шоирнинг айтишича, у Андижонга ҳокимнинг қўлидан машина олиш ниятида борган ва ниятига етган. Ҳокимнинг қўшимча қилишича, машина унинг чўнтагидан эмас, балки андижонлик ҳомийлар ҳисобидан совға қилинган.
Тошкентда ҳокимлик вакиллари Абдулла Арипов ва Жаҳонгир Ортиқхўжаев имзосини қалбакилаштириб ярим миллион долларни қўлга киритгани аниқланди. Аллақачон судланган бу шахслар орасида Чилонзор тумани ҳокимлиги қурилиш бўлим бошлиғи ҳам борлиги айтилмоқда, яна икки нафари ишсиз, бир нафари эса ҳуқуқшунос бўлган.
Тошкентдан Чорвоққа олиб борувчи йўлларга уйи ва машинасидан бошқа ҳаммаёқни ахлатхона деб ўйлайдиган «муқобил идрокли» ҳайдовчилар ва уларнинг йўловчилари учун махсус йўл белгилари ўрнатилиши бошланибди. Белгининг халқона номи шундай экан: «Ҳой, барака топкур, қўлингдаги ахлатни мана бу жойга ташла, ҳаммаёқни ахлат қилма, одам бўл».
Тошкент билан боғлиқ яна учта хабар: Тошкентнинг еттита катта чорраҳасига «вафли чизиқлари» ётқизилди (тирбандликларнинг олдини олиш ва камераларга ёрдам бериш учун); Тошкентдаги электробуслар сони 10 тага етказилади (ҳозирча битта; қачонлиги айтилмади); . Тошкентда дайди мушуклар учун уйча очилди (мушук дўстдир одамга!).
Маош ва даромад ҳақида. Президент Марказий банк тўғрисидаги қонуннинг янги таҳририни имзолади. Унга кўра, Марказий банк ходимлари энди ҳақ тўланадиган бошқа турдаги фаолият билан шуғулланиши тақиқланди (илм билан шуғулланиш ва дарс бериш давомида олинган даромадлар бундан мустасно). Буёқда эса Давлат тест маркази ходимларининг маоши икки ярим бараварга ошадиган бўлиб турибди.
Ўзбекистонда яна бошқа қандай янгиликлар бор? Марказий Осиё давлатлари раҳбарлари 27 ноябрь куни Тошкентда йиғилади. Жиззахда лўли миллатига мансуб фуқаролар учун 150 миллиард сўмга 780 та уй қуриб берилди. Бухорода ИИБ ходимини ҳақоратлаб, унин қўлидан жезлни тортиб олган фуқаро 10 ойга қамалди. Самарқандда бир ой комада ётган 48 ёшли аёл ҳаётга қайтарилди. Ўзбекистон хурмо экспорти бўйича дунёнинг етакчи учлигидаги ўрнини йўқотди.
Жаҳонда-чи, жаҳонда нима гап? Каталония мустақиллиги тарафдорлари марказий Испания ва Францияга олиб борадиган йўлларни тўсиб қўйди. Ҳиндистонда очликдан ўлишни истамаган эркак атайин қамоққа тушди. Башар Асаднинг қариндошлари «Москва-Сити»дан 19 та кўчмас мулк харид қилган. Австралияда ўрмон ёнғинлари 1 миллион гектарга яқин майдонни қамраб олди.
Жаҳон урушлари ҳақида. Италияда Иккинчи Жаҳон урушида ўзбек аскари кўрсатган жасорат ҳақидаги китоб нашр этилди. «Дарё» колумнистлари эса Биринчи Жаҳон уруши ҳақида мақола ёзди, ўқишни тавсия этамиз: «11 ноябрь нега 9 май каби нишонланмайди? Биринчи жаҳон урушининг тугаши ҳақида».
Изоҳ (0)