“Daryo” saytida haftaning eng muhim va muhokamali xabarlari sharhini boshlaymiz.
Abdulloh_qayerda? Bir haftadirki, o‘zbek internet olamini shu ikki og‘iz jumla titratdi. Asli nima bo‘lgandi?
26-oktabr kuni jalaquduqlik Abdulloh Tohirov ehtiyotsizlik oqibatida viloyat ichki ishlar mulozimining mashinasini qirib yuborganidan so‘ng IIBga chaqirtirilgan va shu bo‘yi bedarak yo‘qolgan. Oilasi bir hafta qidirib topmagach, jurnalist Abdurahmon Tashanovga chiqqan. Shundan so‘ng qator axborot nashrlari Abdullohni izlab xabar va maqolalar chop etdi. Adolat SDP va Yoshlar ittifoqi Abdulloh Tohirov voqeasi bo‘yicha bayonot berdi. Ta’kidlash lozimki, Abdullohning qayerdaligini ichki ishlar ham bilmagan va ish “boshqa idora” qo‘lida ekaniga ishora qilgan.
8-noyabr kuni Abdulloh Tohirov uyiga sog‘-omon qaytdi. Biroq “Abdulloh_qayerda?” savoli shaklini o‘zgartirdi – Abdulloh_qayerda_edi? Bu savolga hech kim izoh bergani yo‘q. Abdulloh internet orqali tashvishlanganlarga minnatdorlik bildirdi, ammo qayerda ekani haqida biror izoh bergani yo‘q.
* * *
Xorazmlik taniqli jurnalist Davlatnazar Ro‘zmetov (Davlat Nazar) YTH oqibatida halok bo‘ldi. Bosh prokuratura axborotiga ko‘ra, voqea 6-noyabr kuni soat kechqurun “Urganch — Xiva” yo‘lida yuz bergan — bir fuqaro “Gazel”da jurnalistni urib yuborgan.
Davlatnazar Ro‘zmetov o‘tgan yili paxta terimiga bag‘ishlangan hokimlik yig‘ilishini suratga olmoqchi bo‘lganida qo‘lga olinib, yetti sutkaga qamalgan edi. U Xorazmdagi amaldorlarning doimiy va asosli tanqidchisi sifatida tanilgan edi. Uning ijtimoiy tarmoqdagi do‘stlari shaxsiyda yozgan xabarlarini ochiqlaganda “bosimga chidab bo‘lmayapti”, degani oshkor bo‘ldi. Shu bois ham uning bevaqt o‘limi shubhalarni tobora oshirmoqda va avtohalokat sababini chuqurroq tekshirishga undamoqda.
* * *
IShIDdan O‘zbekistonga tahdid bormi? O‘tgan hafta o‘zbek-tojik chegarasida sodir bo‘lgan voqea chegarachilarimizni sergaklantirdi. 6-noyabrga o‘tar kechasi 20 nafar jangari Dushanbedan 60 kilometr uzoqlikdagi “Ishqobod” postiga hujum qilib, chegarachilarning avtomatlarini egallab olgani xabar qilindi. Tojikiston xavfsizlik xizmati qurollangan jinoiy guruhning 15 nafar a’zosini yo‘q qildi va besh nafar jangarini qo‘lga oldi.
Aytishlaricha, ular Afg‘onistondan qochib o‘tgan IShID jangarilari ekan. Ular Tojikistonga Afg‘oniston orqali kirib kelgan. Ammo Afg‘oniston hukumati buni inkor qildi. Hujumchilar bari tojik fuqarolari bo‘lgan.
O‘zbekiston chegarachilari chorshanba kunidan boshlab Tojikiston va Afg‘oniston bilan chegara punktlarini qo‘riqlashni kuchaytirdi.
Hodisaga turli nuqtai nazardan qarashlar mavjud. Bir guruh ekspertlar Markaziy Osiyoga “Islomiy davlat”ning real xavfi mavjud deb qarasa, ikkinchi guruh ekspertlar jangarilarning IShIDga aloqasini rad etib, mamlakatda xavotir va tartibsizlik keltirib chiqarishning orqasidan kuchishlatar tizimlarga erk berishdan manfaatdor shaxslar tashkillashtirgan voqea demoqda.
* * *
Jahon bozorida meva-sabzavot mahsulotlari savdosi 205 milliard dollarni tashkil etgan zamonda O‘zbekistonning undagi ulushi bir foiz ham emas. Shavkat Mirziyoyevning navbatdagi selektor yig‘ilishi meva-sabzavotchilik tarmog‘ini yanada rivojlantirish va eksportini oshirish, aholi tomorqalaridan samarali foydalanishni ta’minlashga bag‘ishlandi.
Agar yangi joriy etiladigan tizimlar samarali ishlasa, dehqon va bog‘bonning cho‘ntagi pul ko‘radi, deb aytish mumkin. Chunki yangi tashkil qilinayotgan kooperatsiyalar negizida oilalarga 1 gektardan 5 gektargacha ijara asosida yer ajratib berilishi, yangi bog‘ va tokzorlarni barpo etishga “Har bir oila — tadbirkor” dasturi doirasida bir trillion so‘m yo‘naltirilishi belgilandi. Yetishtirilgan meva-sabzavot asosan eksportga yo‘naltiriladi.
* * *
O‘zbekistonda hozirgi vaqtda jami 95 857 nafar fuqaroligi bo‘lmagan shaxs istiqomat qiladi, bu ko‘rsatkich Markaziy Osiyodagi jami fuqaroligi bo‘lmagan shaxslarning 78,5 foizini tashkil etadi. Ko‘rinib turibdiki, bu yechimini topish shart bo‘lgan masalalardandir (fuqaroligi bo‘lmagan kishilar orasida yaqingacha “Islom.uz” diniy-ma’rifiy sayti ma’muri Adham Otajonov, mashhur shoira Rislig‘oy Hotamovalar ham bor edi).
IIB rasmiylari 7-noyabr kuni matbuot anjumanida yangi tahrirdagi “O‘zbekiston Respublikasining fuqaroligi to‘g‘risida” qonun loyihasiga sharh berdi. Rasmiylarning aytishicha, O‘zbekiston fuqaroligiga qabul qilish bo‘yicha dolzarb ishlar amalga oshirilmoqda. Qonun loyihasining e’tiborli joyi shuki, fuqarolikka qabul qilinayotgan shaxs davlat tilini bilish darajasi ham hisobga olinadi.
Qo‘shfuqarolikni qonuniylashtirish haqida savol berilganda IIB rasmiylari bu masala kun tartibida emasligini aytdi.
* * *
Endi O‘zbekistonda Aralash jang san’atlari assotsiatsiyasi bor. Assotsiatsiya faoliyatini 23-noyabr kuni Toshkentda GFC XX musobaqasi bilan boshlaydi. Rossiyalik UFC chempioni Habib Nurmagomedov ham o‘sha kuni tashrif buyuradi.
GFC XX musobaqasida O‘zbekistondan sakkiz nafar sportchi qatnashadi.
Triatlon federatsiyasi raisi Otabek Umarov O‘zbekistonda MMA rivojiga befarq bo‘lmagan homiylarni jalb qiladigan bo‘ldi. Darvoqe, mazkur assotsiatsiya prezidentligiga nomzodlar orasida ovoz to‘plandi va tabiiyki, Otabek Umarov eng ko‘p ovoz bilan Aralash jang san’atlari assotsiatsiyasi prezidentiga aylandi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi voqif bo‘ling.
Izoh (0)