Бугун, 2 ноябрь куни Шанхай ҳамкорлик ташкилотига аъзо давлатлар ҳукумат раҳбарлари кенгашининг Тошкентда бўлиб ўтаётган йиғилишида сўзга чиққан Ўзбекистон бош вазири Абдулла Арипов ШҲТга аъзо давлатларни июнь ойида ташкилотнинг Бишкек саммитида Президент Шавкат Мирзиёев томонидан илгари сурилган ташаббусларни қўллаб-қувватлашга чақирди, деб хабар беради «Gazeta.uz».
«Жаҳон иқтисодиётидаги нотинч вазият давом этар экан, қўшма сармоявий, инфратузилма, транспорт ва агросаноат лойиҳаларини амалга оширишда фаол ҳамкорлик зарур. Ишончимиз комилки, Президентнинг Бишкек саммити доирасида илгари сурган ташаббуслари ушбу вазифаларни амалга ошириш йўлида хизмат қилади», — дейди яна бир бор ШҲТнинг иқтисодий форумини ҳар йили ўтказиш таклифини билдирган Абдулла Арипов.
Бундан ташқари, бош вазир сув танқислиги муаммосини ечиш йўлида биргаликда изланишлар олиб бориш мақсадида «Яшил камар» дастурини ишлаб чиқиш ва қабул қилишни таклиф қилди. Шунингдек, Абдулла Арипов, Орол инқирози оқибатларининг глобал миқёсини ҳисобга олган ҳолда Оролбўйи минтақасини экологик инновациялар ва технологиялар зонаси деб эълон қилиш ташаббусини қўллаб-қувватлаш таклифини билдирди.
Ўзбекистон ШҲТнинг қатор таклифларини қўллаб-қувватлади. Хусусан, бош вазир Россиянинг рақамли даврда узоқ қишлоқ ҳудудларини ривожлантириш концепциясини ва уни амалга ошириш бўйича ҳаракатлар режасини ишлаб чиқиш таклифини мамнуният билан қабул қилди.
Хитой томонининг ШҲТ мамлакатларида халқ дипломатияси институтларини ташкил этиш ва улар ўртасидаги муносабатларни ривожлантириш тўғрисидаги таклифи ҳам қўллаб-қувватланди.
ШҲТга аъзо давлатлар ҳукумат раҳбарлари кенгашининг кейинги мажлисига биринчи маротаба Ҳиндистон раислик қилади.
Изоҳ (0)