Navoiyda pishgan g‘isht ishlab chiqarish sexi davlatga 400 million so‘mdan ortiq zarar yetkazdi, deb xabar bermoqda Bosh prokuratura matbuot kotibi Hayot Shamsutdinov.
Ma’lum bo‘lishicha, “Bahor I.O.” MCHJ mansabdor shaxslari jamiyatga tegishli bo‘lgan pishgan g‘isht ishlab chiqarish sexi mansabdor shaxslari iste’mol qilinuvchi tabiiy gazni hisoblash uskunasining ko‘rsatkichlarini o‘zgartirgan. Oqibatda gaz ta’minoti hududiy filialining manfaatlariga 417,3 million so‘mlik zarar yetkazilgan.
Holat yuzasidan 30-oktabr kuni MIB Navoiy shahar bo‘limi tomonidan Jinoyat kodeksining 185-2-moddasi 4-qismi (Elektr, issiqlik energiyasi, gazni hisobga olish asboblarining ko‘rsatkichlarini o‘zgartirish maqsadida ularga tashqaridan aralashish oqibatida juda ko‘p miqdorda zarar yetkazish) bilan jinoiy ish qo‘zg‘atilib, tergov harakatlari olib borilmoqda.
Ushbu moddada eng kam oylik ish haqining 300 baravaridan 500 baravarigacha miqdorda jarima yoki 2 yildan 3 yilgacha ozodlikni cheklash yoxud 2 yildan 3 yilgacha ozodlikdan mahrum qilish bilan jazosi belgilangan.
Yetkazilgan moddiy zararning o‘rni qoplangan taqdirda ozodlikni cheklash va ozodlikdan mahrum qilish tariqasidagi jazo qo‘llanilmaydi.
Izoh (0)