Ўзбекистон Хотин-қизлар қўмитаси Facebook ижтимоий тармоғида Акром Маҳмудов исмли фойдаланувчи ўз саҳифаси орқали икки аёлнинг ички ишлар ходимлари томонидан ноҳақ 15 суткага қамалгани ҳақидаги иддаоси тасвирга туширилган видеомурожаатга ўз муносабатини билдирди.
Таъкидланишича, видеомурожаат йўллаган аёллар Гавҳарой Хамрақулова ҳамда унинг қизи Гулираъно Хамрақулова Жалақудуқ тумани Қатортол қишлоғида истиқомат қилади.
2013 йилда Гавҳарой Хамрақулованинг акаси Қобилжон Хамрақулов вафот этганидан буён акасининг турмуш ўртоғи, 1976 йилда туғилган Муқаддам Бакиева билан уй-жой талашиб келади.
Гавҳарой Хамрақулова Муқаддам Бакиевани 2018 йилда одам ўлдиришда айблаб, акасидан қолган уйга эгалик қилиш мақсадида унинг устидан ички ишлар идораларига ариза ёзган. Ушбу ариза туман ИИБ томонидан кўриб чиқилгач, ундаги фактлар тасдиқланмаганлиги ҳамда асоссиз эканлиги сабабли Гавҳарой Хамрақулова Маъмурий жавобгарлик тўғрисидаги кодексининг 40-моддаси («Туҳмат») тартибида маъмурий жавобгарликка тортилган.
Шунингдек, 2019 йилнинг январь ойида тўпланган ҳужжатларга кўра, Қўрғонтепа тумани прокуратураси томонидан унга нисбатан Жиноят кодексининг 139-моддаси («Туҳмат») билан жиноят иши қўзғатилган.
«2019 йилнинг 27 май куни Гавҳарой Хамрақулова ва унинг қизи Гулираъно Хамроқулова биргаликда Хўжаобод туманида вилоят ҳокимининг қурувчилар билан сайёр йиғилиш ўтказишидан хабар топиб, юқорида кўрсатиб ўтилган ҳолат юзасидан шикоят қилмоқчи бўлиб борган. Сайёр қабул жараёнида тартиб-интизомга амал қилмасдан, навбатсиз кирмоқчи бўлиб, бу жойда хизмат олиб бораётган ИИБ ходимларининг вилоят раҳбарининг қабулига навбат билан кириш кераклиги тўғрисидаги огоҳлантиришларига қарата уларни уятли сўзлар билан ҳақоратлаган», — дейилади хабарда.
Жамоат тартибини бузганлиги учун ушбу фуқароларга нисбатан тегишли ҳужжатлар расмийлаштирилиб, она-бола Хамрақуловаларга нисбатан Хўжаобод тумани Маъмурий ишлар бўйича суди томонидан Маъмурий жавобгарлик тўғрисидаги кодексининг 183-моддаси («Майда безорилик») ва 194-моддаси («Бўйсунмаслик») тартибида суд жараёни ўтказилган уларнинг ҳар бирига ўн беш сутка муддатдан маъмурий қамоқ жазоси тайинланган.
Изоҳ (0)