Ijtimoiy tarmoqlarda “Chinoz tumani 19-ta’lim maktabi direktori 6-sinf o‘quvchisini ayamasdan kaltakladi” nomli video xabar tarqalgan edi. Toshkent viloyati IIBB matbuot xizmati ushbu holat o‘rganib chiqilganini ma’lum qildi.
Aniqlanishicha, voyaga yetmagan O.R. haqiqatan ham Toshkent viloyati Chinoz tumanida joylashgan 19-sonli umumiy o‘rta ta’lim maktabining 6-“a” sinf o‘quvchisi joriy yilning 9-oktabr kuni o‘quvchilar sinf xonada o‘tirgan vaqtida maktab direktori Sh.X.sinf xonasiga kirib, texnologiya fani o‘qituvchisi yo‘qligi sababli, o‘rniga shu soatda matematika darsi bo‘lishini aytgan.
Shunda o‘quvchi O.R. nima sababdan texnologiya darsi bo‘lmasligini qo‘pol ravishda, baland ovoz bilan so‘ragan. Barcha o‘quvchilar oldida maktab direktoriga nisbatan qo‘pol muomala qilganligi uchun maktab direktori o‘quvchi bilan alohida gaplashib olish maqsadida uni qo‘lidan ushlab, boshqa xonaga olib kirgan va undan tushuntirish xati olgan.
Holat yuzasidan Chinoz tumani IIB tomonidan tergovga qadar tekshiruv harakatlari olib borilib, voyaga yetmagan maktab o‘quvchisi O.R.ga olgan tan jarohatlari yuzasidan sudga oid tibbiy ekspertiza tayyorlangan. 11-oktabr kundagi sud-tibbiy ekspertizasining xulosasisga ko‘ra, voyaga yetmagan O.R.ga sog‘liqni qisqa muddat buzilishiga sabab bo‘lmagan yengil tan jarohati tashhisi qo‘yilgan.
Mazkur holat yuzasidan, fuqaro Sh.X.ning harakatlarida jinoyat alomatlari bo‘lmaganligi sababli, unga nisbatan jinoyat ishi qo‘zg‘atishni rad etish to‘g‘risidagi qaror qabul qilinib, Ma’muriy javobgarlik to‘g‘risidagi kodeksning 52-moddasi 2-qismiga (Qasddan yengil tan jarohati yetkazish) asosan javobgarlik belgilangan. Ushbu moddaga ko‘ra, bu harakat sog‘liqning qisqa muddat yomonlashuviga yoki mehnat qobiliyatini uncha ko‘p davom etmaydigan turg‘un tarzda yo‘qotishga olib kelmagan bo‘lsa, eng kam ish haqining 2 baravaridan 4 baravarigacha miqdorda jarima solishga sabab bo‘ladi.
Hozirda to‘plangan hujjatlar ko‘rib chiqish uchun ma’muriy ishlar bo‘yicha Chinoz tuman sudiga yuborilgan.
Izoh (0)