25-oktabr kuni O‘zbekistonning Avstriyadagi favqulodda va muxtor elchisi, YeXHT hamda Vena shahridagi boshqa xalqaro tashkilotlarning doimiy vakili Sherzod Asadov YeXHTning OAV erkinligi masalalari bo‘yicha vakili Arlem Dezir bilan uchrashdi, deb xabar beradi TIV matbuot xizmati.
Uchrashuvda ikki tomonlama hamkorlik istiqbollari muhokama qilindi.
Suhbatda YeXHTning OAV erkinligi masalalari bo‘yicha vakili va tegishli davlat organlari, xususan, O‘zbekiston Respublikasi Prezidenti Administratsiyasi huzuridagi axborot va ommaviy kommunikatsiyalar agentligi (AOKA) o‘rtasida o‘rnatilgan yaqin va samarali hamkorlikka, shuningdek, mamlakatda so‘z va matbuot erkinligini ta’minlash bo‘yicha hukumat tomonidan amalga oshirilayotgan chora-tadbirlarga yuksak baho berildi.
Uchrashuvda 11-oktabr kuni Samarqand shahrida AOKA tomonidan ommaviy axborot vositalari erkinligini ta’minlash masalalariga bag‘ishlangan xalqaro davra suhbati tashkil etilgani alohida ta’kidlandi.
Ushbu tadbir ishida Vena shahridan kelgan 20 elchi — YeXHT huzuridagi ishtirokchi davlatlarning doimiy vakillari ishtirok etdi.
Shuningdek, tomonlar so‘z va fikr erkinligi prinsiplarini himoya qilish va ilgari surish, YeXHTning OAV erkinligi masalalari bo‘yicha vakili tomonidan OAV sohasida qonun ijodkorligi masalalarida ilg‘or xorijiy tajribani o‘rganishda ko‘maklashishga doir dolzarb masalalar yuzasidan fikr almashdi.
Uchrashuv natijalariga ko‘ra, samarali muloqotni mustahkamlash maqsadida 2020-yilda O‘zbekistonda ommaviy axborot vositalari erkinligi sohasida qator qo‘shma va mintaqaviy tadbirlar o‘tkazilishi rejalashtirilgan.
Izoh (0)