25 октябрь куни Ўзбекистоннинг Австриядаги фавқулодда ва мухтор элчиси, ЕХҲТ ҳамда Вена шаҳридаги бошқа халқаро ташкилотларнинг доимий вакили Шерзод Асадов ЕХҲТнинг ОАВ эркинлиги масалалари бўйича вакили Арлем Дезир билан учрашди, деб хабар беради ТИВ матбуот хизмати.
Учрашувда икки томонлама ҳамкорлик истиқболлари муҳокама қилинди.
Суҳбатда ЕХҲТнинг ОАВ эркинлиги масалалари бўйича вакили ва тегишли давлат органлари, хусусан, Ўзбекистон Республикаси Президенти Администрацияси ҳузуридаги ахборот ва оммавий коммуникациялар агентлиги (АОКА) ўртасида ўрнатилган яқин ва самарали ҳамкорликка, шунингдек, мамлакатда сўз ва матбуот эркинлигини таъминлаш бўйича ҳукумат томонидан амалга оширилаётган чора-тадбирларга юксак баҳо берилди.
Учрашувда 11 октябрь куни Самарқанд шаҳрида АОКА томонидан оммавий ахборот воситалари эркинлигини таъминлаш масалаларига бағишланган халқаро давра суҳбати ташкил этилгани алоҳида таъкидланди.
Ушбу тадбир ишида Вена шаҳридан келган 20 элчи — ЕХҲТ ҳузуридаги иштирокчи давлатларнинг доимий вакиллари иштирок этди.
Шунингдек, томонлар сўз ва фикр эркинлиги принципларини ҳимоя қилиш ва илгари суриш, ЕХҲТнинг ОАВ эркинлиги масалалари бўйича вакили томонидан ОАВ соҳасида қонун ижодкорлиги масалаларида илғор хорижий тажрибани ўрганишда кўмаклашишга доир долзарб масалалар юзасидан фикр алмашди.
Учрашув натижаларига кўра, самарали мулоқотни мустаҳкамлаш мақсадида 2020 йилда Ўзбекистонда оммавий ахборот воситалари эркинлиги соҳасида қатор қўшма ва минтақавий тадбирлар ўтказилиши режалаштирилган.
Изоҳ (0)