“Sauthempton” — “Lester”
Mazkur tur quvnoq ruhda boshlandi. Brenden Rojers boshchiligidagi “Lester” safarda “Sauthempton”ni yanchib tashladi. “Tulkilar” o‘yin avvalidan vaziyatni nazorat qilishga intildi, buning ustiga maydon egalari 12-daqiqayoq bir kishi kam bo‘lib qoldi. Hakam videotakrorlardan so‘ng Rayan Bertranni maydondan chetlatdi. Chorasiz qolgan “avliyolar” o‘z darvozalaridan to‘qqizta to‘p olib chiqishga majbur bo‘ldi. Mehmonlar safida Ayose Peres va Jeymi Vardi het-trik qayd etgan bo‘lsa, Benjamen Chiluell, Yuri Tilemans va Jeyms Meddison bir martadan raqib darvozasini ishg‘ol qildi.
Bu orqali “Lester” Angliya oliy divizioni tarixida safarda qayd etilgan eng yirik g‘alabaga erishdi. Bundan tashqari Jeymi Vardi bu o‘yindagi uchta goli sabab to‘purarlar poygasida peshqadamlikni o‘z qo‘liga oldi.
“Byornli” — “Chelsi”
“Chelsi” bu turda “Byornli” maydoniga safar qildi. Frenk Lempard boshchiligida tobora o‘z o‘yinini topib borayotgan “ko‘klar” mazkur bahsda ham ishonchli g‘alabaga erishdi. Mavsum avvalidan beri nihoyat Kristian Pulishichga imkon berildi va amerikalik hujumchi oqshom qahramoniga aylandi. “Kapitan Amerika” “Chelsi” safida APLdagi debyut golini urishdan tashqari, het-trikka erishdi. Yana bir kiritilgan to‘pga Villian muallif bo‘ldi. O‘yin yakuni arafasida mezbonlar ikkita to‘p bilan javob qaytarishga erishdi, biroq bu “aristokratlar”ning uch ochko bilan qaytishiga halal bermadi.
“Norvich” — “Manchester Yunayted”
O‘tgan turda turnir peshqadami — “Liverpul”ning g‘alabali seriyasiga nuqta qo‘ygan “Manchester Yunayted” bu safar “Norvich” uyida mehmon bo‘ldi. Bu uchrashuvda mankunianlar raqibga hech qanday imkoniyat qoldirmadi. Tanaffusga qadar hisob mehmonlar foydasiga yirik ko‘rinish olishi mumkin edi. Skott Maktominay va Markus Reshford o‘z hisoblariga gol yozdirib qo‘ydi, bundan tashqari, birinchi bo‘limda mezbonlar darvozasi tomon belgilangan ikkita penaltini “qizil iblislar” golga aylantira olmadi. Reshford va Antoni Marsiyal tomonidan yo‘llangan zarbalarni “kanareykalar” posboni Tim Krul bartaraf etdi. Ikkinchi bo‘limda Marsiyal o‘z niyatiga yetdi va o‘yindan gol urdi, bundan tashqari, bahs yakunlanishi arafasida Onel Ernandes hisobni qisqartirishga erishdi. Bu g‘alaba Ole-Gunnar Sulsher shogirdlarini 16-o‘rindan 7-pog‘onaga olib chiqdi.
“Arsenal” — “Kristal Pelas”
Yana bir diqqatga sazovor o‘yinlardan biri Londonda kechdi. Unda “Arsenal” “Kristal Pelas” bilan bahs yuritdi. Mezbonlar o‘yin debyutida ikkita gol urgan holda oldinga o‘tib oldi, tezkor gollardan keyin “to‘pchilar” biroz hotirjamlikka berildi. Buni “Pelas” futbolchilari jazosiz qoldirmadi va hisobni tenglashtirishga muvaffaq bo‘ldi. Uchrashuv yakunlanishi arafasida maydon egalari uchinchi golni urgandi, biroq videotakrorlardan so‘ng Sokratisning goli inobatga olinmadi.
Uchrashuvning 60-daqiqalari o‘tib borayotgan bir vaqtda “Arsenal” yarim himoyachisi Granit Jaka zaxiraga olindi, futbolchining sekin qadam tashlagan holda maydonni tark etayotgani “Emireyts”dagi tomoshabinlarga yoqmadi. Jaka esa bunga provakatsion qiliqlar bilan javob qaytardi. Uchrashuvdan so‘ng londonliklar ustozi Unai Emeri futbolchining bu ishi jazosiz qolmasligini ta’kidladi.
“Liverpul” — “Tottenhem”
Turning markaziy o‘yini Yevropa Chempionlar Ligasining amaldagi finalchilari o‘rtasida kechdi. Mag‘lubiyatsiz seriya qayd etgan holda musobaqa jadvalida yakka peshqadamlik qilayotgan “Liverpul” o‘z maydonida “Tottenhem”ni qabul qildi. Uchrashuv kutilmagan ssenariyda boshlandi, Harri Keyn ilk daqiqadayoq “shporlar”ni oldinga olib chiqdi. Tanaffusga qadar mersisaydliklar bir qancha imkoniyatlarga ega bo‘ldi, biroq Paulo Gassaniganing seyvlari londonliklarni muqarrar gollardan saqlab qoldi. Ikkinchi bo‘limda esa “qizillar” vaziyatni o‘nglay oldi. Dastlab, Jordan Henderson hisobni tenglashtirdi. Undan keyin Muhammad Saloh penaltini aniq bajargan holda g‘alaba to‘pini kiritdi. “Liverpul”ning ikkinchi golidan keyin Maurisio Pochettino shogirdlari oldingi chiziqda mezbonlarga ancha xavf tug‘dirdi, biroq bahs yakuniga qadar vaziyatni o‘nglash poytaxt klubiga nasib etmadi.
Tur raqamlari va statistika
- Ushbu turda jami 38 ta gol urildi. Ularning 23 tasi mehmonlar tomonidan kiritildi
- Faqatgina bitta o‘yin (“Uotford” — “Borgmut”) nursiz yakun topdi, qolgan barcha uchrashuvlarda kamida ikkitadan gol urildi
- “Tottenhem” darvozaboni Paulo Gassaniga “Liverpul”ga qarshi o‘yinda 12 ta seyvni amalga oshirdi. Bu APLda 2017-yildan keyingi eng yuqori ko‘rsatkichdir. Ikki yil avval dekabrda David de Xea “Arsenal”ga qarshi bahsda 14 ta seyv ijro etgandi
- “Tottenhem” 2019-yil APLda to‘qqizta safar o‘yinini boy berdi
- “Norvich” posboni Tim Krul bir o‘yinda ikkita penaltini qaytargan APL tarixidagi sakkizinchi darvozabonga aylandi
- “Manchester Yunayted” APL o‘yinlarida 2000 ta gol urgan tarixdagi ilk klubga aylandi
APL
10-tur bahslari
25-oktabr, juma
“Sauthempton” — “Lester” 0:9
Gollar: 0:1 — 10 Chiluell, 0:2 — 17 Tilemans, 0:3 — 19 Peres, 0:4 — 39 Peres, 0:5 — 45 Vardi, 0:6 — 57 Peres, 0:7 — 58 Vardi, 0:8 — 85 Meddison, 0:9 — 90+4, penalti Vardi.26-oktabr, shanba
“Manchester Siti”—“Aston Villa” 3:0
Gollar: 1:0 — 46 Sterling, 2:0 — 65 de Bryuyne, 3:0 — 70 Gundo‘g‘an“Brayton”—“Everton” 3:2
Gollar: 1:0 — 15 Gross, 1:1 — 20, avtogol Uebster, 1:2 — 74 Kelvert-Lyuin, 2:2 — 80, penalti Mope, 3:2 — 90, avtogol Din“Uotford”—“Bornmut” 0:0
“Vest Hem”—“Sheffild Yunayted” 1:1
Gollar: 1:0 — 44 Snodgrass, 1:1 — 69 Musse“Byornli”—“Chelsi” 2:4
Gollar: 0:1 — 21 Pulishich, 0:2 — 45 Pulishich, 0:3 — 56 Pulishich, 0:4 — 58 Villian, 1:4 — 86 Rodriges, 2:4 — 89 Maknil27-oktabr, yakshanba
“Nyukasl”—“Vulverhempton” 1:1
Gollar: 1:0 — 37 Lassels, 1:1 — 73 Kastro“Arsenal”—“Kristal Pelas” 2:2
Gollar: 1:0 — 7 Papastatopulos, 2:0 — 9 David Luiz, 2:1 — 32, penalti Milivoyevich, 2:2 — 52 Ayyu“Liverpul”—“Tottenhem” 2:1
Gollar: 0:1 — 1 Keyn, 1:1 — 52 Henderson, 2:1 — 75, penalti Saloh“Norvich”—“Manchester Yunayted” 1:3
Gollar: 0:1 — 21 Maktominey, 0:2 — 30 Reshford, 0:3 — 73 Marsyal, 1:3 — 88 ErnandesTurnir jadvali
To‘purarlar ro‘yxati
- Jeymi Vardi — 9 ta gol
- Temmi Abraham — 8 ta gol
- Serxio Aguero — 8 ta gol
- Pyer-Emerik Obameyang — 7 ta gol
- Rahim Sterling — 7 ta gol
- Harri Keyn — 6 ta gol
- Teemu Pukki — 6 ta gol
Nodirxon Hamidxonov tayyorladi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)