«Саутҳэмптон» — «Лестер»
Мазкур тур қувноқ руҳда бошланди. Бренден Рожерс бошчилигидаги «Лестер» сафарда «Саутҳэмптон»ни янчиб ташлади. «Тулкилар» ўйин аввалидан вазиятни назорат қилишга интилди, бунинг устига майдон эгалари 12-дақиқаёқ бир киши кам бўлиб қолди. Ҳакам видеотакрорлардан сўнг Райан Бертранни майдондан четлатди. Чорасиз қолган «авлиёлар» ўз дарвозаларидан тўққизта тўп олиб чиқишга мажбур бўлди. Меҳмонлар сафида Аёсе Перес ва Жейми Варди ҳет-трик қайд этган бўлса, Бенжамен Чилуэлл, Юри Тилеманс ва Жеймс Мэддисон бир мартадан рақиб дарвозасини ишғол қилди.
Бу орқали «Лестер» Англия олий дивизиони тарихида сафарда қайд этилган энг йирик ғалабага эришди. Бундан ташқари Жейми Варди бу ўйиндаги учта голи сабаб тўпурарлар пойгасида пешқадамликни ўз қўлига олди.
«Бёрнли» — «Челси»
«Челси» бу турда «Бёрнли» майдонига сафар қилди. Фрэнк Лэмпард бошчилигида тобора ўз ўйинини топиб бораётган «кўклар» мазкур баҳсда ҳам ишончли ғалабага эришди. Мавсум аввалидан бери ниҳоят Кристиан Пулишичга имкон берилди ва америкалик ҳужумчи оқшом қаҳрамонига айланди. «Капитан Америка» «Челси» сафида АПЛдаги дебют голини уришдан ташқари, ҳет-трикка эришди. Яна бир киритилган тўпга Виллиан муаллиф бўлди. Ўйин якуни арафасида мезбонлар иккита тўп билан жавоб қайтаришга эришди, бироқ бу «аристократлар»нинг уч очко билан қайтишига ҳалал бермади.
«Норвич» — «Манчестер Юнайтед»
Ўтган турда турнир пешқадами — «Ливерпуль»нинг ғалабали сериясига нуқта қўйган «Манчестер Юнайтед» бу сафар «Норвич» уйида меҳмон бўлди. Бу учрашувда манкунианлар рақибга ҳеч қандай имконият қолдирмади. Танаффусга қадар ҳисоб меҳмонлар фойдасига йирик кўриниш олиши мумкин эди. Скотт Мактоминай ва Маркус Рэшфорд ўз ҳисобларига гол ёздириб қўйди, бундан ташқари, биринчи бўлимда мезбонлар дарвозаси томон белгиланган иккита пенальтини «қизил иблислар» голга айлантира олмади. Рэшфорд ва Антони Марсиял томонидан йўлланган зарбаларни «канарейкалар» посбони Тим Крул бартараф этди. Иккинчи бўлимда Марсиял ўз ниятига етди ва ўйиндан гол урди, бундан ташқари, баҳс якунланиши арафасида Онель Эрнандес ҳисобни қисқартиришга эришди. Бу ғалаба Оле-Гуннар Сульшер шогирдларини 16-ўриндан 7-поғонага олиб чиқди.
«Арсенал» — «Кристал Пэлас»
Яна бир диққатга сазовор ўйинлардан бири Лондонда кечди. Унда «Арсенал» «Кристал Пэлас» билан баҳс юритди. Мезбонлар ўйин дебютида иккита гол урган ҳолда олдинга ўтиб олди, тезкор голлардан кейин «тўпчилар» бироз ҳотиржамликка берилди. Буни «Пэлас» футболчилари жазосиз қолдирмади ва ҳисобни тенглаштиришга муваффақ бўлди. Учрашув якунланиши арафасида майдон эгалари учинчи голни урганди, бироқ видеотакрорлардан сўнг Сократиснинг голи инобатга олинмади.
Учрашувнинг 60-дақиқалари ўтиб бораётган бир вақтда «Арсенал» ярим ҳимоячиси Гранит Жака захирага олинди, футболчининг секин қадам ташлаган ҳолда майдонни тарк этаётгани «Эмирейтс»даги томошабинларга ёқмади. Жака эса бунга провакацион қилиқлар билан жавоб қайтарди. Учрашувдан сўнг лондонликлар устози Унаи Эмери футболчининг бу иши жазосиз қолмаслигини таъкидлади.
«Ливерпуль» — «Тоттенҳэм»
Турнинг марказий ўйини Европа Чемпионлар Лигасининг амалдаги финалчилари ўртасида кечди. Мағлубиятсиз серия қайд этган ҳолда мусобақа жадвалида якка пешқадамлик қилаётган «Ливерпуль» ўз майдонида «Тоттенҳэм»ни қабул қилди. Учрашув кутилмаган сценарийда бошланди, Ҳарри Кейн илк дақиқадаёқ «шпорлар»ни олдинга олиб чиқди. Танаффусга қадар мерсисайдликлар бир қанча имкониятларга эга бўлди, бироқ Пауло Гассаниганинг сейвлари лондонликларни муқаррар голлардан сақлаб қолди. Иккинчи бўлимда эса «қизиллар» вазиятни ўнглай олди. Дастлаб, Жордан Ҳендерсон ҳисобни тенглаштирди. Ундан кейин Муҳаммад Салоҳ пенальтини аниқ бажарган ҳолда ғалаба тўпини киритди. «Ливерпуль»нинг иккинчи голидан кейин Маурисио Почеттино шогирдлари олдинги чизиқда мезбонларга анча хавф туғдирди, бироқ баҳс якунига қадар вазиятни ўнглаш пойтахт клубига насиб этмади.
Тур рақамлари ва статистика
- Ушбу турда жами 38 та гол урилди. Уларнинг 23 таси меҳмонлар томонидан киритилди
- Фақатгина битта ўйин («Уотфорд» — «Боргмут») нурсиз якун топди, қолган барча учрашувларда камида иккитадан гол урилди
- «Тоттенҳэм» дарвозабони Пауло Гассанига «Ливерпуль»га қарши ўйинда 12 та сейвни амалга оширди. Бу АПЛда 2017 йилдан кейинги энг юқори кўрсаткичдир. Икки йил аввал декабрда Давид де Хеа «Арсенал»га қарши баҳсда 14 та сейв ижро этганди
- «Тоттенҳэм» 2019 йил АПЛда тўққизта сафар ўйинини бой берди
- «Норвич» посбони Тим Крул бир ўйинда иккита пенальтини қайтарган АПЛ тарихидаги саккизинчи дарвозабонга айланди
- «Манчестер Юнайтед» АПЛ ўйинларида 2000 та гол урган тарихдаги илк клубга айланди
АПЛ
10-тур баҳслари
25 октябрь, жума
«Саутҳэмптон» — «Лестер» 0:9
Голлар: 0:1 — 10 Чилуэлл, 0:2 — 17 Тилеманс, 0:3 — 19 Перес, 0:4 — 39 Перес, 0:5 — 45 Варди, 0:6 — 57 Перес, 0:7 — 58 Варди, 0:8 — 85 Мэддисон, 0:9 — 90+4, пенальти Варди.26 октябрь, шанба
«Манчестер Сити»—«Астон Вилла» 3:0
Голлар: 1:0 — 46 Стерлинг, 2:0 — 65 де Брюйне, 3:0 — 70 Гундўған«Брайтон»—«Эвертон» 3:2
Голлар: 1:0 — 15 Гросс, 1:1 — 20, автогол Уэбстер, 1:2 — 74 Кэлверт-Льюин, 2:2 — 80, пенальти Мопе, 3:2 — 90, автогол Дин«Уотфорд»—«Борнмут» 0:0
«Вест Ҳэм»—«Шеффилд Юнайтед» 1:1
Голлар: 1:0 — 44 Снодграсс, 1:1 — 69 Муссе«Бёрнли»—«Челси» 2:4
Голлар: 0:1 — 21 Пулишич, 0:2 — 45 Пулишич, 0:3 — 56 Пулишич, 0:4 — 58 Виллиан, 1:4 — 86 Родригес, 2:4 — 89 Макнил27 октябрь, якшанба
«Ньюкасл»—«Вулверҳэмптон» 1:1
Голлар: 1:0 — 37 Ласселс, 1:1 — 73 Кастро«Арсенал»—«Кристал Пэлас» 2:2
Голлар: 1:0 — 7 Папастатопулос, 2:0 — 9 Давид Луиз, 2:1 — 32, пенальти Миливоевич, 2:2 — 52 Айю«Ливерпуль»—«Тоттенҳэм» 2:1
Голлар: 0:1 — 1 Кейн, 1:1 — 52 Ҳендерсон, 2:1 — 75, пенальти Салоҳ«Норвич»—«Манчестер Юнайтед» 1:3
Голлар: 0:1 — 21 Мактоминей, 0:2 — 30 Рэшфорд, 0:3 — 73 Марсьяль, 1:3 — 88 ЭрнандесТурнир жадвали
Тўпурарлар рўйхати
- Жейми Варди — 9 та гол
- Тэмми Абраҳам — 8 та гол
- Серхио Агуэро — 8 та гол
- Пьер-Эмерик Обамеянг — 7 та гол
- Раҳим Стерлинг — 7 та гол
- Ҳарри Кейн — 6 та гол
- Теему Пукки — 6 та гол
Нодирхон Ҳамидхонов тайёрлади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)