O‘zbekistonda 2019-yilning ikkinchi choragi yakunlari bo‘yicha 291 million dollarlik qurilish mahsulotlari import qilingan bo‘lsa, 13 million dollarlik mahsulot eksport qilingan. Bu haqda Prezidentning “Qurilish materiallari sanoatini jadal rivojlantirishga oid qo‘shimcha chora-tadbirlar to‘g‘risida”gi qarori ijrosiga bag‘ishlangan matbuot anjumanida ma’lum qilindi, deya xabar bermoqda “Daryo” muxbiri Musulmonbek Ibrohimov.
“O‘zsanoatqurilishbank” departament direktori o‘rinbosari Otabek Toshevning ma’lum qilishicha, O‘zbekistonda qurilishning umumiy hajmi oktabr oyi holatiga 51 trillion so‘mni tashkil etgan. Bu 2018-yildagi ko‘rsatkichga nisbatan 14 barobarga ko‘p. Ayni vaqtda, sohada importning ulushi kundan-kun oshib bormoqda va “millionlab dollar pul chetga chiqib ketmoqda”.
“O‘zbekiston 2018-yilda 440 million dollarlik qurilish mahsulotlarini import qilgan bo‘lsa, bor-yo‘g‘i 21 million dollarlik mahsulot eksport qilgan, ya’ni 419 million dollarlik mahsulot chetdan olib kelingan. 2019-yilning ikkinchi choragi yakunlari bo‘yicha ham deyarli shunday vaziyat — 291 million dollarlik mahsulot import qilingan bo‘lsa, 13 million dollarlik mahsulot eksport qilingan”, — dedi bank vakili.
Ma’lum bo‘lishicha, talab yuqori bo‘lgan yog‘och qipiqli plitalar — DSP 100 foiz Rossiyadan import qilinadi. Ushbu mahsulotni mahalliylashtirish maqsadida Mo‘ynoqda qamishdan DSP ishlab chiqaruvchi korxona ishga tushirish rejalashtirilgan. 2020-yil aprelida ish boshlashi kutilayotgan korxonada qamishdan yiliga 50 ming kub metr DSP olinadi.
Prezidentning qurilish materiallari sanoatini rivojlantirishga qaratilgan qarorga ko‘ra, 2025-yilga borib DSP ishlab chiqarishni 15 barobarga oshirish rejalashtirilgan. Shuningdek, gulqog‘oz ishlab chiqarish — 47 barobarga, parket — 19, gazobeton bloklar, lok-bo‘yoq va float-oyna mahsulotlari — 4, bazaltli kompozit armatura — 3 va sement materiallarini ishlab chiqarishni esa 2 barobarga oshirish ko‘zda tutilgan.
Izoh (0)