Ўзбекистонда 2019 йилнинг иккинчи чораги якунлари бўйича 291 миллион долларлик қурилиш маҳсулотлари импорт қилинган бўлса, 13 миллион долларлик маҳсулот экспорт қилинган. Бу ҳақда Президентнинг «Қурилиш материаллари саноатини жадал ривожлантиришга оид қўшимча чора-тадбирлар тўғрисида»ги қарори ижросига бағишланган матбуот анжуманида маълум қилинди, дея хабар бермоқда «Дарё» мухбири Мусулмонбек Иброҳимов.
«Ўзсаноатқурилишбанк» департамент директори ўринбосари Отабек Тошевнинг маълум қилишича, Ўзбекистонда қурилишнинг умумий ҳажми октябрь ойи ҳолатига 51 триллион сўмни ташкил этган. Бу 2018 йилдаги кўрсаткичга нисбатан 14 баробарга кўп. Айни вақтда, соҳада импортнинг улуши кундан-кун ошиб бормоқда ва «миллионлаб доллар пул четга чиқиб кетмоқда».
«Ўзбекистон 2018 йилда 440 миллион долларлик қурилиш маҳсулотларини импорт қилган бўлса, бор-йўғи 21 миллион долларлик маҳсулот экспорт қилган, яъни 419 миллион долларлик маҳсулот четдан олиб келинган. 2019 йилнинг иккинчи чораги якунлари бўйича ҳам деярли шундай вазият — 291 миллион долларлик маҳсулот импорт қилинган бўлса, 13 миллион долларлик маҳсулот экспорт қилинган», — деди банк вакили.
Маълум бўлишича, талаб юқори бўлган ёғоч қипиқли плиталар — ДСП 100 фоиз Россиядан импорт қилинади. Ушбу маҳсулотни маҳаллийлаштириш мақсадида Мўйноқда қамишдан ДСП ишлаб чиқарувчи корхона ишга тушириш режалаштирилган. 2020 йил апрелида иш бошлаши кутилаётган корхонада қамишдан йилига 50 минг куб метр ДСП олинади.
Президентнинг қурилиш материаллари саноатини ривожлантиришга қаратилган қарорга кўра, 2025 йилга бориб ДСП ишлаб чиқаришни 15 баробарга ошириш режалаштирилган. Шунингдек, гулқоғоз ишлаб чиқариш — 47 баробарга, паркет — 19, газобетон блоклар, лок-бўёқ ва флоат-ойна маҳсулотлари — 4, базалтли композит арматура — 3 ва цемент материалларини ишлаб чиқаришни эса 2 баробарга ошириш кўзда тутилган.
Изоҳ (0)