Bosh prokuratura huzuridagi Departament “My 5” telekanalining “Markaziy studiya” informatsion dasturida S.Oning jinoyat ishi yuzasidan tayyorlangan lavha yuzasidan munosabat bildirdi.
Qayd etilishicha, “Mening Yurtim 5” telekanalining “Markaziy studiya” informatsion dasturi orqali fuqarolar S.O. va uning otasi T.O. 23-oktabr kuni chiqish qilib, Bosh prokuratura huzuridagi Departament organlari xodimlarini valyutaga oid jinoyatni fosh etishdagi xatti-harakatlari yuzasidan norozilik bildirgan.
Xususan, fuqaro S.O. tanishib, gaplashib yurgan qizi I., Toshkent shahrida opasi uy sotib olishi uchun undan 87 million so‘m pullarini 10 000 dollarga ayirboshlab berishini iltimos qilganligini, opasini o‘g‘li avtohalokatga uchragani, qiz bilan ancha yaqin bo‘lib qolganligi sababli uning valyuta mablag‘larini ayirboshlash bo‘yicha iltimosini bajarmoqchi bo‘lib, Nurafshon shahriga borganligini va u yerda milliy taomlar kafesida xorijiy valyutani sotayotganida Departament xodimlari tomonidan ushlanib, unga bosim o‘tkazilganligi haqida bayon qilgan.
Telekanal orqali bildirilgan bunday fikrlar keng jamoatchilik o‘rtasida huquqni muhofaza qiluvchi organlar faoliyati haqida salbiy tasavvur hosil qilishi ehtimolini inobatga olib, Bosh prokuratura huzuridagi Iqtisodiy jinoyatlarga qarshi kurashish departamenti qonunga xilof ravishda valyuta qimmatliklarini olishi yoki o‘tkazishi milliy qonunchilikka binoan javobgarlikka tortilishi belgilanganini ma’lum qilgan.
S.O.ning qonunga xilof ravishda valyuta qimmatliklarini olish va uni o‘tkazish harakatlari tezkor qidiruv tadbirlari hamda sud hujjatlari bilan to‘liq isbotlangani qayd etilgan.
Jumladan: Amaldagi qonunchilikka asosan S.O.ning harakatlariga baho berilganda Jinoyat kodeksining 177-moddasining (valyuta qimmatliklarini qonunga xilof ravishda olish yoki o‘tkazish) subyekti 16 yoshga to‘lgan, aqli raso shaxs hisoblanishi belgilangan. Bunda ijtimoiy xavfli qilmishni sodir etayotgan shaxsning “valyutafurush” bo‘lishi jinoyat subyektining majburiy belgisi bo‘lishi mumkinligi belgilanmagan. Ushbu holatda S.Otaboyev 16 yoshga yetgan va aqli raso shaxs hisoblanganligi sababli jinoyatning subyekti hisoblanadi.
S.O. har bir AQSH dollarini 8 700 so‘mdan hisoblab sotgan. Shuningdek u ushbu noqonuniy valyuta oldi-sotdisining pirovard natijasidan moddiy manfaat ko‘zlaganligidan dalolat beruvchi dalillar mavjud.
Xususan, tezkor tadbir o‘tkazilgan kun, 14-iyunda “Milliy bank” Nurafshon filialidan olingan ma’lumotga ko‘ra har bir AQSH dollarining so‘mga nisbatan qiymati 8 518 so‘m 68 tiyinni tashkil etib, 8000 AQSH dollari 68,1 million so‘mga teng bo‘lgan.
Bundan tashqari, tergov jarayoni va ochiq sud majlisida so‘roq qilingan S.O. aybiga qisman iqrorlik bildirgan holda bergan ko‘rsatmasiga ko‘ra, u mashina olish uchun yig‘ib qo‘ygan otasining 10 000 dollarni (otasini xabardor qilmasdan) olib, I. unga taklif qilgan 87 million so‘m pullar orqali foyda ko‘rib olishni o‘ylab, Nurafshon shahriga o‘rtoqlari va tog‘asi bilan borgan. U yerda I. unga 10000 dollarga emas, 8000 dollarga teng 69,6 million so‘m topganligi sababli 8000 dollarni ayriboshlagan. Pirovardida qilmishi qonunga zid bo‘lganligini tushunib yetgani va chin ko‘ngildan pushaymonligini bildiradi.
Bundan tashqari, “Markaziy studiya”dagi suhbatda T.O. o‘g‘li Jinoyat kodeksining 65-moddasiga asosan javobgarlikdan ozod qilingan bo‘lsa-da, 8 000 dollarni unga qaytarmasdan davlat foydasiga musodara qilinganini aytgan.
Bunga javoban prokuratura mazkur jinoyat ishi bo‘yicha ashyoviy dalil va jinoyat predmeti hisoblangan 10 000 dollarning taqdiri Jinoyat-protsessual kodeksi talablariga asosan qonuniy hal qilinganini bildirgan.
Jumladan, S.O.ning o‘ziga nisbatan bo‘lgan jinoyat ishini tugatishni so‘rab, jinoyat ishlari bo‘yicha Nurafshon shahar sudiga bergan arizasi hamda himoyachisining iltimosnomasini inobatga olib, sud uni 65-moddasiga asosan javobgarlikdan ozod qilingan. Ashyoviy dalil sifatida olingan 10 000 dollardan 2000 dollar o‘ziga qaytarilgan hamda 8000 dollar jinoyat predmeti sifatida davlat daromadi hisobiga o‘tkazilgan. Qolaversa, S.Otaboyevga nisbatan chiqarilgan sudning mazkur ajrimi qonuniy kuchda bo‘lib, unga nisbatan shikoyat yoki protest keltirilmagan.
Shuningdek, Jinoyat kodeksining 65-moddasining qo‘llanilishi va uning qonundagi mazmuni ham to‘g‘ri talqin qilinishi lozimligi ta’kidlangan. Sudlanuvchiga nisbatan Jinoyat kodeksining 65-moddasi qo‘llanishi uning aybsiz ekanini anglatmaydi. Ushbu holatda sudlanuvchi aybsiz ekani uchun emas, balki uning qilmishi ijtimoiy xavfliligini yo‘qotganligi sabab javobgarlikdan ozod qilinmoqda, xolos.
Izoh (0)