Andijon shahridagi trikotaj mahsulotlari ishlab chiqaruvchi korxona 26-oktabrga o‘tar kechasi alanga ichida qolgan. Mazkur yong‘inni o‘chirish uchun 2 soatdan ortiq vaqt ketgan. Bu haqda viloyat FVB yong‘in xavfsizligi boshqarmasi matbuot xizmatiga tayanib “Daryo” muxbiri Umidjon Mamarasulov xabar bermoqda.
Boshqarma matbuot xizmati rahbari Azizbek Yarqulovning ma’lum qilishicha, 25-oktabr kuni soat 23:36 da Andijon shahri, Soy ko‘chasi, 5-uyda joylashgan kichik sanoat zonasi hududidagi “Dinar textile” mas’uliyati cheklangan jamiyatida yong‘in sodir bo‘layotganligi to‘g‘risida boshqarma markaziy dispetcherlik xizmatiga tezkor xabar kelib tushgan.
Mazkur xabarga asosan yong‘in sodir bo‘lgan manzilga soat 23:40 da Andijon shahar yong‘in xafsizligi bo‘limi 1-sonli yong‘in qutqaruv qismidagi 2 ta bo‘linma yetib borgan. Bino 26-oktabr kuni soat 00:30 da o‘rab olinib, soat 02:45 da o‘chirishga erishilgan.
Dastlabki o‘rganishlar natijalariga ko‘ra, birinchi yong‘in o‘chirish ekipajlari yetib borgan vaqtda quritish sexidagi matolarni qurituvchi uskunada boshlangan yong‘in oqibatida ushbu sexning tom qismi qulab tushib, yong‘in tomning ochiq joyidan ma’muriy bino, ombor va boshqa sexlarning tom va ichki qismlariga tarqagan. Yong‘inning taxminiy maydoni 1500 kvadrat metrni tashkil etgan.
Dinar textile MChJ ma’muriy binosining 3-qavatida yong‘inni o‘chirishga jalb etilgan yong‘in o‘chirish ekipaji bo‘linma komandiri J.N. 2-qavatga tushib ketib, tan jarohati olgan. Unga birinchi tibbiy yordam ko‘rsatilib, RShTYoIM Andijon filialiga olib borilgan, biroq ko‘rsatilgan tibbiy muolajalarga qaramasdan vafot etgan.
Hozirda yong‘inning kelib chiqish sabablari va yetkazlagan moddiy zarar miqdori aniqlanmoqda. Holat yuzasidan Andijon shahar prokuraturasi tomonidan tergovga qadar tekshiruv ishlari olib borilmoqda.
Yong‘in tufayli korxona ishchi-xizmatchilari orasida jabrlanganlar bo‘lmagani bildirilmoqda.
Ma’lumot uchun, korxona 2018-yilda Andijon shahridagi eski mashinasozlik zavodi o‘rnida qurilgan bo‘lib, kalavadan matolarni to‘qish, bo‘yash, matoga ishlov berish va saqlash faoliyati bilan shug‘ullanadi. Jamiyat 4 qavatli ma’muriy binoda faoliyat yuritadi. Ayni vaqtda binoning uchinchi va to‘rtinchi qavatlari foydalanilmasdan ta’mirlash uchun tayyorlanayotgan bo‘lgan.
Izoh (0)