Xalq ta’limi vazirligida 23-oktabr, chorshanba kuni navbatdagi kengaytirilgan Hay’at yig‘ilishi bo‘lib o‘tdi, deb xabar bermoqda vazirlik matbuot xizmati. Unda umumta’lim maktab bitiruvchilarining oliy ta’lim muassasalariga kirishi bo‘yicha qilingan tahlil va ko‘rilgan chora-tadbirlar natijadorligi hamda kelgusidagi vazifalar muhokama etilgan.
Bitiruvchilarning oliy o‘quv yurtiga kirish natijalarini to‘liq ko‘rib chiqish maqsadida O‘zbekistondagi xorijiy hamda chet el oliy o‘quv yurtlariga kirish natijalari ham tahlil qilingan.
Xususan, “attestst.uzedu.uz” elektron bazasidagi barcha (282 794 nafar) 11-sinf bitiruvchilarining nomma-nom ro‘yxati (attestat raqami asosida) olinib, bugungi kunda ularning qaysi oliy o‘quv yurtiga kirgani, davlat granti yoki kontrakt asosida ekani, o‘qishga kirmagan bitiruvchilarning bugungi kunda ishga joylashgani haqida hududiy boshqarmalardan tezkor ma’lumotlar olingan.
Tahlillarga ko‘ra, 282 794 nafar bitiruvchidan 34 837 nafari (yoki 12,3 foizi) oliy o‘quv yurtiga qabul qilingan. Ularning 25 280 nafari (73 foizi) respublikadagi davlat oliy ta’lim muassasalariga, 2 794 nafari (8 foizi) O‘zbekistondagi xorijiy oliy o‘quv yurtlariga, 6 793 nafari chet eldagi xorijiy oliy o‘quv yurtlariga o‘qishga kirgan. Shuningdek, bitiruvchilarning 6 958 nafari (28%h foiz) davlat granti asosida, 27 879 nafari (72 foiz) to‘lov-kontrakt asosida o‘qishga qabul qilingan.
Bitiruvchilarning oliy o‘quv yurtiga kirish natijalarini hududlar kesimida tahlil qilinganda, birinchi uchtalikda Toshkent shahri (36 foiz), Navoiy viloyati (21,9 foiz), Buxoro viloyati (18,4 foiz) o‘rin egallagan. Qashqadaryo (14-o‘rinda 7,4 foiz), Jizzax (8,0 foiz), Andijon (8,2 foiz) viloyatlari so‘nggi o‘rinlarda qolib ketgan.
Shuningdek, birorta ham bitiruvchisi oliy o‘quv yurtiga kirmagan maktablar soni ham tahlil qilingan. Bu borada “antirekordchi” hududlar ro‘yxatiga Qashqadaryo (44 ta — 39,7 foiz), Jizzax (189 ta — 34,9 foiz), Samarqand (374 ta — 30,8 foiz) viloyatlari kirgan.
Nisbatan yaxshi natijalar Toshkent shahri (1 ta — 0,3 foiz), Buxoro (33 ta — 6,2 foiz), Xorazm (43 ta — 8,2 foiz) viloyatlarida ekanligi ma’lum bo‘lgan.
Xabarda aytilishicha, yig‘ilishda yaxshi natija ko‘rsatgan ta’lim muassasalari direktorlari rag‘batlantirilib borilishi, yomon natija ko‘rsatadigan maktab rahbarlari jazolanishi ta’kidlangan.
Izoh (0)