Investitsiyalar va tashqi savdo vazirligi tomonidan Toshkent viloyati hokimligi bilan birgalikda 25—26-oktabr kunlari Invest in Tashkent Region (IITR — “Toshkent viloyatiga investitsiya kiriting”) xalqaro investitsion forumi tashkil etildi. Nurafshon shahrida bo‘lib o‘tgan forumning ochilishida 40 dan ortiq mamlakatdan kelgan 350 nafarga yaqin mehmon — hukumat delegatsiyalari, institutsional investorlar va biznes vakillari ishtirok etdi.
Kuzatuvchilarning fikricha, yalpi hududiy mahsulot hajmini so‘nggi to‘rt yil ichida ikki barobarga oshirishga muvaffaq bo‘lgan Toshkent viloyati iqtisodiyotning real sektorida sarmoya kiritish uchun unikal maydon sanaladi.
“Qisqa muddatda shunday muhim va murakkab tadbirni yuqori darajada tashkil qila olganligimizdan mamnunmiz. IITR 2019 forumi mehmonlaridan, shuningdek, Toshkent viloyatini turli biznes manfaatlariga ega bo‘lgan, ammo mintaqamizga bir xil maqsadda investitsiya kiritayotgan yuzlab odamlar uchun jalb qilish markaziga aylantirayotgan hamkorlarimizdan minnatdormiz. O‘ylaymanki, ushbu investforum endi an’anaga aylanadi, chunki xorijiy delegatlardan shunday takliflarni ko‘p eshitdik”, — dedi Toshkent viloyati hokimi o‘rinbosari Jamshid Abdusalomov.
Ochilish marosimidan so‘ng forum ishtirokchilari Chimyon tog‘-kurort majmualarida “Sanoat”, “Qishloq xo‘jaligi” va “Turizm” yo‘nalishlari bo‘yicha ishni davom ettirdi. IITR 2019 forumining birinchi kuni 25-oktabr kechqurun bitimlarni imzolash marosimi bilan yakunlandi.
Abdusalomovning ta’kidlashicha, IITR forumi ishchi sessiyalarining natijalariga ko‘ra tuzilgan shartnomalarning umumiy summasi 1 milliard dollardan oshdi.
“Bu ilk hududiy investforum uchun yaxshi natija deb hisoblayman. Investitsion muhitni rivojlantirish sa’y-harakatlarini desentralizatsiya qilish bo‘yicha O‘zbekiston rahbariyatining tashabbuslari o‘zini to‘liq oqlayotgani bugun har tomonlama ko‘rindi. O‘zbekiston viloyatlarining boshqa davlatlarning biznes doiralari va mintaqaviy ma’muriyatlari bilan bevosita aloqalari iqtisodiyotda yanada tezkor va mahsuldor hamkorlikka yordam beradi”, — dedi u.
IITR 2019 xalqaro investitsion forumining ikkinchi kun dasturi mehmonlarning Toshkent viloyati sanoat va madaniy-tarixiy obyektlariga tashrif buyurishini ko‘zda tutadi.
Izoh (0)