Bir muddat avval bloger Dima Qayumning Rishton bozorida kutubxona (kitob do‘koni) qurishiga qarshi bo‘lgan bir guruh ayollar uni “samosud” qilgani bilan bog‘liq video tarqalgan edi. Voqea senator Iqbol Mirzo Rishtonga borib, bozordagi yangi quriladigan kutubxona uchun ramziy g‘isht qo‘yib berganining ertasiga — 14-oktabr kuni yuz bergan edi.
17-oktabr kuni Rishton tumani IIB Huquqbuzarliklar profilaktikasi bo‘limi tomonidan Dima Qayumga qarshi qaratilgan voqeaga ishtirok etgan ayollar bilan tergovoldi surishtiruv ishlari olib borilayotgani ma’lum bo‘lgandi. Farg‘ona viloyati hokimligi matbuot kotibi Muhammadjon Obidovning 25-oktabr kuni “Daryo” muxbiri Musulmonbek Ibrohimovga ma’lum qilishicha, bloger Dima Qayumga tahdid qilgan ayollar ma’muriy javobgarlikka tortilgan (ayollarga nisbatan aynan qanday choralar belgilangani ochiqlanmagan).
Muhammadjon Obidovning qo‘shimcha qilishicha, yuz bergan voqealardan so‘ng Farg‘ona viloyati hokimi Shuhrat G‘aniyev shaxsan o‘zi Rishtonga borgan va Dima Qayum bilan uchrashib, ramziy g‘isht qo‘yilgan kutubxona qurilishiga o‘zi kafil bo‘lishini ma’lum qilgan. Bundan tashqari, Axborot va ommaviy kommunikatsiyalar agentligi direktori Komil Allamjonov Rishton bozoridagi kutubxona qurilishi uchun mablag‘ ajratilishini ma’lum qilgan.
Ramziy g‘isht qo‘yilgan yerni Dima Qayumning kutubxonasi qurilishi uchun berish bo‘yicha Rishton tumani hokimining qarori chiqqan. Qayd etishlaricha, qurilajak yangi kitob do‘koni hokimlik balansida bo‘ladi.
Izoh (0)