Ijtimoiy tarmoqlarda Toshkentning Yunusobod tumanidagi 260-maktab atrofida Spark haydovchisi bo‘lgan yigit voyaga yetmagan bolalarga katta qiziqish bildirayotgani va shaharda yana pedofil paydo bo‘lgani haqida xabarlar tarqaldi.
IIBB matbuot xizmati mazkur xabarlar yuzasidan rasmiy ma’lumot berib, shaharda pedofil paydo bo‘lgani haqidagi asossiz taxminlarni rad etdi. Qayd etilishicha, voqea 21-oktabr, dushanba kuni yuz bergan. Voqea joyiga IIBB PPX va Milliy gvardiya xodimlari yetib borgan. Jabrlanuvchi sifatida hech kim murojaat qilmagan.
Aniqlanishicha, Spark haydovchisi 19 yoshli X.Sh. bo‘lib, u Yunusobod tumanidagi maktab oldida 17 yoshli do‘sti U.O.ni kutib turgan bo‘lgan. Do‘sti chiqqach, ular ko‘chada uzoq turib qolishgan, keyin X.Sh. do‘stini uyiga olib borib qo‘yishini taklif qilgan. “Mening hech qanday yomon niyatim yo‘q edi”, — degan haydovchi yigit.
Xalq ta’limi vazirligi matbuot xizmatining xabar berishicha, maktab o‘quvchilariga hech qanday ziyon yetmagan. Hozirda mazkur holat yuzasidan Yunusobod tuman Ichki ishlar bo‘limi tomonidan surishtiruv ishlari olib borilmoqda. Ushbu voqea yuzasidan yakuniy ma’lumot surishtiruv ishlari tugagach taqdim etiladi.
Izoh (0)