Davlat statistika qo‘mitasi yuridik shaxs maqomiga ega bo‘lgan korxona va tashkilotlarda ishlovchi xodimlarning o‘rtacha oylik nominal hisoblangan ish haqi to‘g‘risidagi ma’lumotlarni e’lon qildi.
2019-yil yanvar—sentabr oylarida O‘zbekiston bo‘yicha yuridik shaxs maqomiga ega bo‘lgan korxona va tashkilotlarda ishlovchilarning o‘rtacha oylik nominal hisoblangan ish haqi 2 213 400 so‘mni (ish haqiga ustama, mukofot, rag‘batlantirish xususiyatiga ega to‘lovlar, kompensatsiya va ishlanmagan vaqt uchun haq kabi to‘lovlar kiritilgan, shuningdek, uning tarkibida jismoniy shaxslar daromad solig‘i va kasaba uyushmasiga to‘lovlar ham mavjud) tashkil etib, 2018-yilning mos davriga nisbatan 31,2 foizga o‘sdi.
Xususan, ta’lim sohasida 23 298 ta muassasada 1 013 300 nafar (jami ishlovchilarga nisbatan ulushi 38 foiz) xodim ishlagan bo‘lib, ularga hisoblangan ish haqi fondi 15963,3 milliard so‘mni (jami ish haqi fondidagi ulushi 30,1 foiz) tashkil etgan. Ta’lim sohasi bo‘yicha o‘rtacha oylik nominal hisoblangan ish haqi 1 750 400 so‘mni tashkil etib, 2018-yilning mos davriga nisbatan 36,7 foizga oshgan.
Respublikadagi o‘rtacha oylik nominal hisoblangan ish haqiga nisbatan sezilarli yuqori ko‘rsatkichlar Toshkent shahri — 129,9 foiz, Toshkent viloyati — 103,2 foiz, Jizzax viloyati — 101,9 foiz va Namangan viloyati — 101,2 foiz hissasiga to‘g‘ri kelgan.
Sanoat sohasi bo‘yicha bir qator hududlarda o‘rtacha oylik nominal hisoblangan ish haqining respublika o‘rtacha oylik ish haqiga nisbatan yuqori ko‘rsatkichlari kuzatilgan. Shu bilan birga, respublikaning o‘nta hududida ushbu sohadagi o‘rtacha oylik nominal hisoblangan ish haqining respublika darajasidan past ekanligi aniqlangan.
Sog‘liqni saqlash va ijtimoiy xizmatlar ko‘rsatish sohasi bo‘yicha o‘rtacha oylik nominal hisoblangan ish haqining respublikadagi o‘rtacha oylik ish haqiga nisbatan yuqori ko‘rsatkichlari Toshkent shahri 118,6 foiz, Buxoro viloyati 111,9 foiz, Qoraqаlpog'iston Respublikasi 111,0 foiz va Sirdaryo viloyati 109,0 foiz hissasiga to‘g‘ri kelgan.
Izoh (0)