Ижтимоий тармоқларда Тошкентнинг Юнусобод туманидаги 260-мактаб атрофида Spark ҳайдовчиси бўлган йигит вояга етмаган болаларга катта қизиқиш билдираётгани ва шаҳарда яна педофил пайдо бўлгани ҳақида хабарлар тарқалди.
ИИББ матбуот хизмати мазкур хабарлар юзасидан расмий маълумот бериб, шаҳарда педофил пайдо бўлгани ҳақидаги асоссиз тахминларни рад этди. Қайд этилишича, воқеа 21 октябрь, душанба куни юз берган. Воқеа жойига ИИББ ППХ ва Миллий гвардия ходимлари етиб борган. Жабрланувчи сифатида ҳеч ким мурожаат қилмаган.
Аниқланишича, Spark ҳайдовчиси 19 ёшли Х.Ш. бўлиб, у Юнусобод туманидаги мактаб олдида 17 ёшли дўсти У.О.ни кутиб турган бўлган. Дўсти чиққач, улар кўчада узоқ туриб қолишган, кейин Х.Ш. дўстини уйига олиб бориб қўйишини таклиф қилган. «Менинг ҳеч қандай ёмон ниятим йўқ эди», — деган ҳайдовчи йигит.
Халқ таълими вазирлиги матбуот хизматининг хабар беришича, мактаб ўқувчиларига ҳеч қандай зиён етмаган. Ҳозирда мазкур ҳолат юзасидан Юнусобод туман Ички ишлар бўлими томонидан суриштирув ишлари олиб борилмоқда. Ушбу воқеа юзасидан якуний маълумот суриштирув ишлари тугагач тақдим этилади.
Изоҳ (0)