“O‘zbekiston” telekanalining “Bir jinoyat izidan” ko‘rsatuvida Parkent tumanida sodir etilgan mudhish jinoyat tafsilotlari haqida so‘z bordi.
Parkent tumani “Shampan” mahalla fuqarolar yig‘inidan ikki kilometr uzoqlikda joylashgan hududda 24 yoshli Sanjar (ism-shariflar o‘zgartirilgan) ismli yigitning jasadi daraxtga osilgan holda topildi. Tuman IIB tomonidan tezkor guruh tuzilib, hodisa joyiga yetib bordi.
Qayd etilishicha, marhum Sanjar olti oycha avval Rossiyadan ishlab qaytgan, sevgan qiziga unashtirilgan, yaqinda to‘yi bo‘lishi kerak edi.
Sanjar Rossiyada ikki yilcha ishlagan, bir yilcha avval ukasini ham yoniga chaqirgan. Qaytib kelgach jamg‘argan pullarining yarmiga Damas sotib olgan, qolgan yarmiga esa to‘y qilish niyatida edi.
Jasad sud-tibbiy ekspertizasi tomonidan tekshirilganida Sanjarning osilgan paytida o‘lik holda bo‘lgani aniqlandi. Uni avval bo‘g‘ib o‘ldirib, keyin osib ketishgan.
Tuman IIB tomonidan marhumni tanigan fuqarolar bilan suhbatlar o‘tkazilgan.
Marhumning telefon apparati ko‘zdan kechirilganida uning so‘nggi marta ukasi bilan gaplashgani aniqlandi. Sanjarning ukasi Anvarning telefoni tekshirilganida uning ammasining o‘g‘li Hamid bilan suhbati IIB xodimlari diqqatini tortdi. Anvar va Hamid qandaydir ishni rejalashtirgani va uni bugun bitirishga kelishgani telefonda qayd etilgan edi.
Tergov natijasida Sanjarning o‘z ukasi Anvar va jiyani Hamid tomonidan o‘ldirilgani ma’lum bo‘ldi.
“Rossiyadan ishlab qaytdik. Topgan pulimizning yarmiga Damas oldik. Qolganiga akamni uylantirmoqchi edik. Akam uni o‘z nomiga rasmiylashtirdi. Menga umuman bermasdi mashinani. Nima uchun birga ishlab topgan pulimizga u ham uylanishi, ham mashina olishi kerak, deb o‘yladim. Keyin akamni o‘ldirish payiga tushdim. Lekin buni bir o‘zim uddalay olmasdim. Shunda jiyanim Hamiddan yordam so‘radim”, — deydi Anvar.
“O‘sha kuni akam ko‘chaga chiqib ketdi. Mashina uyda qoldi. Shunda mashinani haydab ko‘chaga chiqdim, akam o‘tirgan joyga bordim. Akam meni ko‘rib urishib, rulga o‘zi o‘tirishini bilardim. Menga shu kerak edi”, — deya so‘zlarini davom ettiradi Anvar.
Shu tarzda Anvar va Hamid oldindan tuzilgan reja asosida Sanjarni bo‘g‘ib o‘ldirgan va daraxtga osib ketgan.
Eslatib o‘tamiz, 2019-yilning aprel oyida xuddi shunday jinoyat Samarqand viloyatining Bulung‘ur tumanida ham sodir etilgan edi. O‘shanda uka otasining Damas’iga ega chiqish uchun akasini bo‘g‘ib o‘ldirgan va uning jasadini daraxtga osib ketgan edi.
Izoh (0)