To‘rt yildirki, chiroqchilik tadbirkorlar adolat izlaydi. Biri “men haqman”desa, ikkinchisi “adolat men tomonda”, deydi. Yana biri esa “tuman hokimi topshirig‘iga bilan ishlab chiqarishni yo‘lga qo‘ygandim, bugungi kunga kelib esa borimdan ayrilib, bankrot bo‘ldim”, deya shikoyat qiladi. Bunga na tuman va na viloyat hokimligi mas’ullari quloq tutadi.
Tahririyatga murojaat qilgan tadbirkor Umida Mirzayevaning yozishicha, OAV ular uchun so‘nggi umid. “Daryo” muxbiri Otabek Qo‘ldoshev umidi puchga chiqayotgan tadbirkorlar arziga quloq tutdi.
— 2015-yil 10-yanvar kuni tumanimizda tadbirkorlar ishtirokida yig‘ilish bo‘lib o‘tdi, — deydi Umida Mirzayeva. — Respublikadan ishchi guruhi rahbari sifatida kelgan Shavkat Javlonov raisligida o‘tgan yig‘ilishda tumanimizda sanoat zonasi tashkil etish taklif qilindi. Anchadan beri bo‘sh turgan “Yangi qurilish” ko‘chasidagi sobiq bolalar shifoxonasi tadbirkorlarga ishlab chiqarish uchun beriladigan bo‘ldi. Tumanning o‘sha paytdagi rahbari Ravshan Komilov ishlab chiqarishni yo‘lga qo‘ymoqchi bo‘lgan tadbirkorlarga hududni ko‘rsatib, ish boshlashni taklif qildi. 6 nafar tadbirkor tuman hokimi taklifiga binoan ish boshladik.
2015-yil 13-mart kuni Ravshan Komilov yanvar oyida bo‘lib o‘tgan yig‘ilish qaroriga muvofiq shifoxona hududidan yuridik va jismoniy shaxslarga doimiy foydalanish uchun yer uchastkalarini berish to‘g‘risida qaror chiqaradi. Qarorda sobiq shifoxona hududining 1,24 gektar maydoni va 2 ta binosi 14 nafar tadbirkorga tanlov asosida ishlab chiqarish uchun berilishi lozimligi ta’kidlanadi. Biroq noma’lum sabablarga ko‘ra, tanlov o‘tkazilmaydi.
Ma’lum qilinishicha, o‘sha paytda bo‘sh turgan sobiq bolalar shifoxonasi 2,8 gektar maydonda joylashgan bo‘lib, 1970-yili hashar yo‘li bilan qurilgan. Ma’lum muddat bolalar yozgi oromgohi, so‘ngra shifoxona sifatida foydalanilgan. 2013-yildan beri bo‘sh yotgan bino 2014-yil tuman obodonlashtirish boshqarmasi balansiga o‘tkazilgan.
Tuman hokimi taklifiga binoan 6 nafar tadbirkor ishni boshlab yubordi. Kimdir non va non mahsulotlari, kimdir shirinliklar tayyorlay boshladi. Yana kimdir esa o‘zi uchun munosib sharoit hozirlash ilinjida eski va qarovsiz binolarni ta’mirlashga kirishdi. Xullas, hokim aytdi — tadbirkor bajardi.
Ushbu voqealar bo‘lib o‘tayotgan vaqtda — 2015-yil 24-iyul kuni esa sobiq shifoxona hududi 2,8 gektar yer maydoni va 14 ta binosi bilan birga viloyat hokimi Zafar Ro‘ziyev raisligida bo‘lib o‘tgan tender tanlovida “Chiroqchi tomorqa” MChJ tomonidan “nol” qiymatda sotib olindi. Boisi 2014-yil 2-yanvar kuni Chiroqchi tuman hokimligi tomonidan viloyat Davlat raqobat boshqarmasi boshlig‘iga yuborilgan xatda sobiq bolalar shifoxonasini tumandagi bo‘sh yotgan bino sifatida tadbirkorlarga “nol” balansda taklif qilinishi lozimligi so‘ralgandi.
Bir vaqtning o‘zida tuman hokimi taklifiga ko‘ra 6 nafar tadbirkor ham ish boshladi, viloyat hokimi raisligida o‘tkazilgan tender g‘olibi ham yer va binolarga egalik huquqini qo‘lga kiritdi. Alal-oqibat mojaro boshlandi. 2016-yili bo‘y ko‘rsata boshlagan muammo 2019-yilga kelib yechimsiz tugunga aylandi.
— Hokim bizga ishlab chiqarish taklifini bergach, 2015-yil 20-mart kuni viloyat hokimi, hududiy tanlov komissiyasi raisi Z.Ro‘ziyev hamda viloyat raqobat boshqarmasi boshlig‘i, tanlov komissiyasi raisi o‘rinbosari I.Jo‘rayevga sobiq bolalar shifoxonasi hududining 1,24 gektari va 2 ta binosi tender tanloviga kiritilmasligini so‘rab, murojaat qilgan, — deydi tadbirkor Umida Mirzayeva. — Ammo ko‘rib turganingizdek, hokimning ushbu xati inobatga olinmagan.
Tadbirkor Sherzod Ibodullayev 6 nafar tadbirkorga ish boshlashi uchun alohida qaror berilmagani, 2015-yil 13-mart kuni chiqqan qaror esa umumiy mazmunga egaligi, natijani ko‘rsatuvchi tanlov o‘tkazilmaganligini bildirmoqda.
— Tuman hokimining 2015-yil 13-martdagi qarorida jismoniy va yuridik shaxslarga tanlov asosida yer ajratib berilishi aytilgan bo‘lsa-da, aynan qaysi tadbirkorlarga berilishi yozilmagan, qolaversa, tanlov asosida berilsin deyilyapti, lekin tanlov ham o‘tkazilmagan, — deydi “Chiroqchi tomorqa” MChJ rahbari Sherzod Ibodullayev. — Men esa viloyat hokimi raisligida bo‘lib o‘tgan tender tanlovida binoni jami 2,8 gektar maydoni va 14 ta binosi bilan “nol” balansda olyapman. Demak, hududga o‘z-o‘zidan men haqliman.
Aniqlanishicha, Xususiylashtirish, monopoliyadan chiqarish va raqobatni rivojlantirish qo‘mitasi viloyat hududiy boshqarmasi hamda “Chiroqchi tomorqa” MChJ o‘rtasida 2015-yil 24-iyul kuni shartnoma tuziladi. Unga ko‘ra, MChJ rahbari Sherzod Ibodullayev sobiq bolalar shifoxonasini qo‘lga kiritgan vakil sifatida 1,5 yil ichida 2 milliard 400 million so‘m mablag‘ sarflab, quruq va ho‘l mevalarni qayta ishlash, shirinliklar, non va non mahsulotlari ishlab chiqarishni yo‘lga qo‘yishi, ishlab chiqarilgan hamda qishloq xo‘jaligi mahsulotlarini saqlovchi omborxona — muzlatgich o‘rnatishi va kamida 25 ta yangi ish o‘rni yaratishi lozim edi. Biroq aytilgan ishlardan faqatgina omborxona — 600 tonnalik muzlatgich o‘rnatilgan, xolos.
— Bino va yer maydonini tenderda yutib olsam-da, ish boshlashimga dastlab tuman obodonlashtirish boshqarmasi, so‘ng tadbirkorlar xalal berdi, — deydi Sherzod Ibodullayev. — Binodan chiqib ketishmadi. Bu haqda qo‘mitaning viloyatdagi mas’ullariga ma’lum qilgandim. Shundan so‘ng ularning yordami bilan 2016-yil aprel oyida tuman obodonlashtirish boshqarmasini binodan chiqarishga erishdik. Tadbirkorlarga kelganda esa ish ancha ortga surildi.
Ma’lum qilishlaricha, ishga Raqobatni rivojlantirish qo‘mitasi aralashgach, tumanning o‘sha paytdagi hokimi Ravshan Komilov tadbirkor Sherzod Ibodullayevni chaqirib, 6 nafar tadbirkorni hududga o‘zi kiritgani, 1,24 gektar yer, 2 ta binodan tashqari hududda ish qilaverishi mumkinligini aytgan va tadbirkorni shashtidan qaytargan. Oqibatda qo‘mita viloyat boshqarmasi tadbirkor Sherzod Ibodullayevni sudga beradi va aytilgan va’dalar 2016-yil noyabr oyiga qadar ham bajarilmaganligi, boz ustiga tadbirkor tomonidan 1 milliard 43 million so‘m investitsiya kiritilgani to‘g‘risida yolg‘on ma’lumot taqdim etilgani ro‘kach qiladi.
Jinoyat ishlari bo‘yicha Chiroqchi tuman sudining 2016-yil 4-noyabr kuni bo‘lib o‘tgan sudida tadbirkor Sherzod Ibodullayev aytilgan va’dalarni bajarmagani, soxta hujjut taqdim etgani uchun aybdor deb topilib, eng kam oylik ish haqining 55 baravari miqdoridagi jarimaga tortiladi. Ammo amnistiya sabab jazodan qutilib qoladi.
— Ravshan Komilov Mirishkor tumaniga hokim bo‘lib o‘tgach, “Chiroqchi tomorqa” yana harakatga tushdi, — deydi Umida Mirzayeva. — Bizni sudga berdi. 2018-yil avgust oyida ishlab turgan joyimizdan majburiy tartibda chiqarishdi.
Umida Mirzayevaning ma’lum qilishicha, hokim taklifiga binoan ish boshlagach eski va qarovsiz binolarni 12 million so‘mga ta’mirlatgan. 50-60 million so‘mlik ishlab chiqarish texnikalarini olib kelib, 17 ta yangi ish o‘rni yaratgan. 2018-yil avgust oyida sud tomonidan majburiy tartibda chiqarish lozimligi haqidagi qaror sabab bugun o‘sha qilingan ishlarning bari yo‘qqa chiqmoqda.
Chiroqchi tuman iqtisodiy sudining 2018-yil 15 yanvar kunidagi hal qiluv qarorida Umida Mirzayeva rahbarligidagi “Chiroqchi shirinliklari” MChJ sobiq shifoxonadan majburiy tartibda chiqarilishi lozimligi bildiriladi. 2018-yil avgust oyida esa tadbirkor binodan tuman MIB tomonidan majburan chiqarib yuboriladi.
— Shuncha qilingan mehnat barbod bo‘ldi, — deydi Umida Mirzayeva. – Hududni obodonlashtirib, yangi ish o‘rinlari yaratgandim. Ishlab chiqarishimni endi rivojlantirayotgandim. Shumi tadbirkorni qo‘llab-quvvatlash?
Sherzod Ibodullayev binoning bo‘shatilishi 2019-yil aprel oyiga qadar davom etganini aytmoqda. Shuningdek, Umida Mirzayeva binodan chiqib ketish uchun undan zararni qoplab berishni talab qilgan.
— Non ishlab chiqarish maqsadida qurilgan tandir uchun“Chiroqchi shirinliklari” MChJ ga 11 million 550 ming so‘m to‘lab berganmiz, — deydi Sherzod Ibodullayev. — Qolgan o‘ziga kerakli texnika va anjomlarini olib chiqib ketishgan.
Ma’lum bo‘lishicha, hududda Umida Mirzayeva rahbarligidagi “Chiroqchi shirinliklari” MChJ bilan birgalikda “Biznes chapparik” hamda “Xoldorov Shavkat Abrayevich” xususiy korxonalari ishlab chiqarishni yo‘lga qo‘ygan. Qolgan 3 nafar tadbirkor esa hali ish boshlamagan. Aktam Sultonov rahbarligidagi “Sharofiddin invest” xususiy korxonasi ham o‘sha paytda tuman hokimi taklifiga ko‘ra ish boshlashni niyat qilgan. Tadbirkorga og‘zaki tarzda yer va 2 ta qarovsiz bino berilgan. Aktam Sultonov o‘sha binolarda kolbasa hamda non sexi qurishni niyat qilgan-u, ammo mojaro sabab hali ish boshlamagan.
Yem ishlab chiqaruvchi “Yusupov O‘ktam Xudoyberdiyevich” oilaviy korxonasi esa o‘sha paytda tuman hokimi tomonidan chiqarilgan 45 sotix yerga egalik qilish haqidagi qarori bo‘lgani bois sudda yutib chiqqan va bugungi kunda o‘z ishini davom ettirmoqda.
Tadbirkorlar tomonidan “Daryo” muxbiriga taqdim etilgan suratlardan ma’lum bo‘lishicha, tadbirkorlardan “Xoldorov Shavkat Abrayevich” firmasi qolipli nonlar ishlab chiqaruvchi pech o‘rnatgan. Makaron sexlar keltirgan. Qolgan tadbirkorlar qanday shart-sharoit yaratgani esa noma’lum.
“Chiroqchi tomorqa” MChJ mas’ullari tadbirkorlar yana muammo orttirib, ularni ishdan chalg‘itmasa va’da qilingan ishlar tez fursatda bajarilishini aytishmoqda.
— Ushbu hududga kiritilishi lozim bo‘lgan mablag‘larimiz tayyor, imkoniyatlarimiz bor. Faqat bizni ishdan chalg‘itib, sudma-sud yurishga majbur qilishmasa, tez orada va’da qilingan ishlar bajarilib, 25 ta yangi ish o‘rni yaratiladi, — deydi “Chiroqchi tomorqa” mutasaddilari. – 600 tonnalik muzlatgichimiz tayyor. Qolgan ishlar ham, albatta, bajariladi.
Ko‘rganlarimizdan anglashilishicha, har ikki tomondagi tadbirkorlar ham hokimlik va mutasaddi tashkilotlarning xatoliklari qurboni bo‘lmoqda. O‘z vaqtida tumanda sanoat zonasi tashkil etish uchun tadbirkorlarni jalb qilgan tuman hokimi ham, tumanda foydalanilmayotgan bo‘sh binolardan unumli foydalanishni maqsad qilgan viloyat hokimi raisligidagi hududiy tanlov komissiyasi a’zolari ham qaysidir ma’noda haq, albatta. Ammo anglashilmovchiliklar kasri tadbirkorlarga urayotgani achinarli. Xo‘p, bo‘lar ish bo‘ldi. Ammo 4 yildan beri tuman va viloyat hokimliklari nega masalaga jiddiy qaramayapti? Yoki buning uchun ham Toshkentdan kimdir kelishi va muammoni hal qilib berishi kerakmi?
Izoh (0)