O‘zbekiston bosh vaziri Abdulla Aripov 22-oktabr kuni Moskvadagi “Ochiq innovatsiyalar—2019” forumida ishtirok etib, O‘zbekiston va boshqa rivojlanayotgan davlatlar oldida turgan raqamli rivojlanish kun tartibidagi asosiy muammolar haqida so‘z yuritdi, deb xabar bermoqda “Gazeta.uz”. Ushbu forumda Rossiya bosh vaziri Dmitriy Medvedev, Belarus bosh vaziri Sergey Rumas ham qatnashgan.
Abdulla Aripovning ta’kidlashicha, raqamli infrastruktura bilan ta’minlanganlik raqamli iqtisodiyot barqaror rivojlanishining asosiy shartlaridan biridir. Xalqaro elektr aloqa ittifoqining ma’lumotlariga ko‘ra, Yer yuzi aholisining 40 foizdan ortig‘i internetdan foydalanish imkoniyatiga ega emas.
“Biz ham mamlakat aholisining yarmi istiqomat qiladigan qishloq joylarni raqamli imkoniyat bilan ta’minlash muammosiga duch kelganmiz”, — degan u.
Bosh vazirning aytishicha, 2020-yilning oxirigacha, mamlakatdagi barcha ijtimoiy obyektlar, shu jumladan, maktablar, maktabgacha ta’lim tashkilotlari va tibbiyot muassasalari — jami 20 mingdan ortiq obyektlar optik tolali aloqaga asoslangan keng polosali internet bilan qamrab olinadi. Mobil tarmoqlar abonentlari sonini 20—23 million nafarga yetkazish rejalashtirilgan.
“Joriy yilda O‘zbekiston 5G mobil tarmog‘i muvaffaqiyatli sinovdan o‘tkazdi va biz kelasi yilda Toshkentda ushbu tarmoqni tijoriy ishga tushirishni maqsad qildik”, — deya qo‘shimcha qilgan Abdulla Aripov.
Shuningdek, hukumat rahbari O‘zbekiston BAA bilan hamkorlikda 1 million nafar dasturchi tayyorlash bo‘yicha qo‘shma dasturni amalga oshirishni boshlayotgani, bu istalgan shaxslar uchun Yagona masofaviy ta’lim portali orqali AQShning yetakchi kompaniyalarining o‘quv dasturlari asosida raqamli ko‘nikmalarni egallash imkoniyatini yaratishini aytdi.
Izoh (0)