«Ўзбекистон» телеканалининг «Бир жиноят изидан» кўрсатувида Паркент туманида содир этилган мудҳиш жиноят тафсилотлари ҳақида сўз борди.
Паркент тумани «Шампан» маҳалла фуқаролар йиғинидан икки километр узоқликда жойлашган ҳудудда 24 ёшли Санжар (исм-шарифлар ўзгартирилган) исмли йигитнинг жасади дарахтга осилган ҳолда топилди. Туман ИИБ томонидан тезкор гуруҳ тузилиб, ҳодиса жойига етиб борди.
Қайд этилишича, марҳум Санжар олти ойча аввал Россиядан ишлаб қайтган, севган қизига унаштирилган, яқинда тўйи бўлиши керак эди.
Санжар Россияда икки йилча ишлаган, бир йилча аввал укасини ҳам ёнига чақирган. Қайтиб келгач жамғарган пулларининг ярмига Damas сотиб олган, қолган ярмига эса тўй қилиш ниятида эди.
Жасад суд-тиббий экспертизаси томонидан текширилганида Санжарнинг осилган пайтида ўлик ҳолда бўлгани аниқланди. Уни аввал бўғиб ўлдириб, кейин осиб кетишган.
Туман ИИБ томонидан марҳумни таниган фуқаролар билан суҳбатлар ўтказилган.
Марҳумнинг телефон аппарати кўздан кечирилганида унинг сўнгги марта укаси билан гаплашгани аниқланди. Санжарнинг укаси Анварнинг телефони текширилганида унинг аммасининг ўғли Ҳамид билан суҳбати ИИБ ходимлари диққатини тортди. Анвар ва Ҳамид қандайдир ишни режалаштиргани ва уни бугун битиришга келишгани телефонда қайд этилган эди.
Тергов натижасида Санжарнинг ўз укаси Анвар ва жияни Ҳамид томонидан ўлдирилгани маълум бўлди.
«Россиядан ишлаб қайтдик. Топган пулимизнинг ярмига Damas олдик. Қолганига акамни уйлантирмоқчи эдик. Акам уни ўз номига расмийлаштирди. Менга умуман бермасди машинани. Нима учун бирга ишлаб топган пулимизга у ҳам уйланиши, ҳам машина олиши керак, деб ўйладим. Кейин акамни ўлдириш пайига тушдим. Лекин буни бир ўзим уддалай олмасдим. Шунда жияним Ҳамиддан ёрдам сўрадим», — дейди Анвар.
«Ўша куни акам кўчага чиқиб кетди. Машина уйда қолди. Шунда машинани ҳайдаб кўчага чиқдим, акам ўтирган жойга бордим. Акам мени кўриб уришиб, рулга ўзи ўтиришини билардим. Менга шу керак эди», — дея сўзларини давом эттиради Анвар.
Шу тарзда Анвар ва Ҳамид олдиндан тузилган режа асосида Санжарни бўғиб ўлдирган ва дарахтга осиб кетган.
Эслатиб ўтамиз, 2019 йилнинг апрель ойида худди шундай жиноят Самарқанд вилоятининг Булунғур туманида ҳам содир этилган эди. Ўшанда ука отасининг Damas’ига эга чиқиш учун акасини бўғиб ўлдирган ва унинг жасадини дарахтга осиб кетган эди.
Изоҳ (0)