Iroq hukumati Suriyadagi vaziyat sabab mamlakat yana urush yoqasiga kelishi mumkinligidan xavotirdaligini bildirdi

Iroq hukumati Turkiyaning Suriya shimoli-sharqidagi harbiy harakatlari mamlakat hududiga terrorchilar kirib olishiga sabab bo‘lishi mumkinligidan xavotirda ekanligini ma’lum qildi. Bu haqda rasmiy tashrif bilan Vashingtonda bo‘lib turgan hukumat vakili, Iroq bosh vazirining o‘rinbosari va moliya vaziri Fuad Husayn ma’lum qildi, deb yozmoqda “TASS”.

Husaynning so‘zlariga ko‘ra, IShID terroristik tashkilotining ayrim guruhlari Iroq tumanlarida yashirinib olgan. Vazirning aytishicha, Suriyadagi beqaror vaziyat jnagarilarning faollashishiga sharoit yaratishi mumkin.

“Turkiyaning Suriya hududidagi harbiy harakatlar sabab IShID qayta uyg‘onishidan, Iroq urush xavfi ostida qolib ketishi mumkinligidan xavotirdaman”, — deya ta’kidlagan Fuad Husayn.

9-oktabrda Anqara Suriya shimoli-sharqida “Tinchlik bulog‘i” operatsiyasi boshlagan. Turkiya Suriya bilan chegara hududini “Suriya demokratik kuchlari”, Kurdiston ishchi partiyasi kurd jangarilaridan tozalab, mamlakatdagi qochoqlar uchun “xavfsiz hudud” tashkillashtirishni maqsad qilgan. Damashq ushbu operatsiyani tajovuzkor harakat deb atadi, dunyo davlarlari Anqaraning ushbu operatsiyasini keskin qoraladi.17-oktabrda AQSh hamda Turkiya rasmiylari Anqarada muzokaralar o‘tkazib harbiy harakatlarni to‘xtatishni kelishib oldi. Turkiya “Suriya demokratik kuchlari” jangari otryadlarining chegara hududidan chiqib ketishi uchun harbiy harakatlarni 120 soatga to‘xtatdi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.