Ироқ ҳукумати Суриядаги вазият сабаб мамлакат яна уруш ёқасига келиши мумкинлигидан хавотирдалигини билдирди

Ироқ ҳукумати Туркиянинг Сурия шимоли-шарқидаги ҳарбий ҳаракатлари мамлакат ҳудудига террорчилар кириб олишига сабаб бўлиши мумкинлигидан хавотирда эканлигини маълум қилди. Бу ҳақда расмий ташриф билан Вашингтонда бўлиб турган ҳукумат вакили, Ироқ бош вазирининг ўринбосари ва молия вазири Фуад Ҳусайн маълум қилди, деб ёзмоқда «ТАСС».

Ҳусайннинг сўзларига кўра, ИШИД террористик ташкилотининг айрим гуруҳлари Ироқ туманларида яшириниб олган. Вазирнинг айтишича, Суриядаги беқарор вазият жнагариларнинг фаоллашишига шароит яратиши мумкин.

«Туркиянинг Сурия ҳудудидаги ҳарбий ҳаракатлар сабаб ИШИД қайта уйғонишидан, Ироқ уруш хавфи остида қолиб кетиши мумкинлигидан хавотирдаман», — дея таъкидлаган Фуад Ҳусайн.

9 октябрда Анқара Сурия шимоли-шарқида «Тинчлик булоғи» операцияси бошлаган. Туркия Сурия билан чегара ҳудудини «Сурия демократик кучлари», Курдистон ишчи партияси курд жангариларидан тозалаб, мамлакатдаги қочоқлар учун «хавфсиз ҳудуд» ташкиллаштиришни мақсад қилган. Дамашқ ушбу операцияни тажовузкор ҳаракат деб атади, дунё давларлари Анқаранинг ушбу операциясини кескин қоралади.17 октябрда АҚШ ҳамда Туркия расмийлари Анқарада музокаралар ўтказиб ҳарбий ҳаракатларни тўхтатишни келишиб олди. Туркия «Сурия демократик кучлари» жангари отрядларининг чегара ҳудудидан чиқиб кетиши учун ҳарбий ҳаракатларни 120 соатга тўхтатди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.