Ichki ishlar vazirligi Axborot xizmati Facebook ijtimoiy tarmog‘ida “Toshkent viloyati Bekobod shahar ixtisoslashtirilgan san’at maktabining 4 qiz va 1 yigit talabasi, bir qizni urib tan jarohati yetkazgan” sarlavhasi ostida tarqalgan xabarlarga munosabat bildirdi.
Mazkur holat yuzasidan Toshkent viloyati Ichki ishlar Bosh boshqarmasi ma’lumot berishicha, joriy yilning sentabr oyidan buyon ijtimoiy tarmoq orqali tanish bo‘lgan Bekobod shahrida joylashgan 11-sonli ixtisoslashtirilgan san’at maktabining 2003-yilda tug‘ilgan o‘quvchi qizlari M.A. va D.Z. o‘rtasida turli kelishmovchiliklar bo‘lib turgan. Kelishmovchilikni bartaraf etish maqsadida, D.Z. tanishlari bilan M.A.ni maktab hovlisining holi hududiga chaqirib, ular gap talashib qolgan.
Natijada ular o‘zaro janjallashib ketishadi. D.Z. M.A.ni bir-ikki marotaba urib, turtib yuborgan vaqtida M.A. muvozanatini yo‘qotib, beton qoplamaga peshonasining chakka qismi bilan yiqilgan. Ushbu holatda D.Z.ning tanishlari ularni ajratgan.
Yiqilib tan jarohati olgan M.A. tanishi bilan Bekobod shahrining markaziy shifoxonasiga borgan.
Shundan so‘ng, 21-sentabr kuni M.A.ning dugonasi 2004-yilda tug‘ilgan N.M. uni shifoxonaga ko‘rgani borib, M.A.ning noroziligiga qaramasdan ijtimoiy tarmoq orqali D.Z. va uning tanishi Nozima ismli qizning fotosuratlarini “Qidirilmoqda” izohi bilan tarqatgan hamda shaharning jamoat joylari peshtaxtalariga yopishtirgan.
Holat yuzasidan D.Z.ning xatti-harakatlarida Jinoyat kodeksining 109-moddasida (“Qasddan badanga yengil shikast yetkazish”) ko‘rsatilgan jinoyat alomatlari mavjud bo‘lsa-da, D.Z. voyaga yetmaganligi uchun Jinoyat kodeksining 17-moddasiga muvofiq D.Z. hamda N.M.ning onalariga nisbatan, farzandlarini tarbiyalash va ta’lim berish borasidagi majburiyatini yetarli bajarmaganligi sababli, Ma’muriy javobgarlik to‘g‘risidagi kodeksning 47-moddasi 1-qismiga (“Bolalarni tarbiyalash va ularga ta’lim berish borasidagi majburiyatlarni bajarmaslik”) asosan to‘plangan hujjatlar shahar hokimligi qoshidagi voyaga yetmaganlar bilan ishlash komissiyasiga yuborilgan.
Izoh (0)