O‘zbekistonning tashqi savdo aylanmasi hajmi 2019-yilning yanvar—sentabr oylarida 31,6 milliard dollarni tashkil etdi. Bu ko‘rsatkich o‘tgan yilning shu davriga nisabatan 8,5 milliard dollarga yoki 37,2 foizga o‘sgan. Bu haqda Davlat statistika qo‘mitasi tomonidan ma’lum qilindi.
Statistika qo‘mitasi ma’lumotlariga ko‘ra, ushbu ko‘rsatkichda eksport hajmi 13,6 milliard dollar va import hajmi 17,9 milliard dollarni tashkil qiladi. Bunda o‘sish ko‘rsatkichi mos ravishda 45,5 foiz va 31,5 foizni tashkil etgan. Mazkur davrda 4,2 milliard dollar qiymatida salbiy tashqi savdo saldosi qayd etilgan.
Qayd etilishicha, O‘zbekiston jahonning 181 dan ortiq mamlakati bilan savdo aloqalarini amalga oshirib kelmoqda. Respublika tashqi savdo aylanmasining asosiy qismi Xitoy (18,7 foiz), Rossiya (14,9 foiz), Qozog‘iston (8,3 foiz), Janubiy Koreya (6,6 foiz), Turkiya (5,8 foiz), Germaniya (2,4 foiz) va Qirg‘iziston (2 foiz) hissasiga to‘g‘ri kelgan.
Qo‘mita hisobotiga ko‘ra, 2019-yilning uchinchi choragida tashqi savdo aylanmasi hajmi 11,9 milliard dollarni tashkil etgan va joriy yilning ikkinchi choragi bilan taqqoslaganda 16,4 foizga o‘sgan.
2019-yilning uchinchi choragida tashqi savdo aylanmasi umumiy hajmida import hajmining 58,1 foizdan 56,2 foizga kamayishi, eksport ulushining esa 41,9 foidan 43,8 foizga ko‘payishi kuzatilgan.
To‘qqiz oy yakunlariga ko‘ra, MDH mamlakatlari bilan savdo hajmi 10,7 milliard dollarni tashkil qilgan va O‘zbekiston tashqi savdo aylanmasidagi ulushi 33,8 foizga yetgan. MDH mamlakatlari bilan tashqi savdoning qariyb 37,7 foizi, shundan eksportning 42,6 foizi va importning 33,9 foizi qo‘shni mamlakatlar hissasiga to‘g‘ri kelgan.
Hisobot ma’lumotlariga ko‘ra, boshqa xorijiy davlatlarning tashqi savdo aylanmasidagi ulushi 66,2 foizga yetib, 20,9 milliard dollarni tashkil qilgan va o‘tgan yilning mos davridagi tashqi savdo aylanmasiga nisbatan 47,8 foizga o‘sgan.
Tashqi iqtisodiy faoliyat bo‘yicha 20 ta yirik hamkor davlat qatoridan beshta davlatda ijobiy tashqi savdo balansi kuzatilgan, xususan, Afg‘oniston (424,2 million dollar), Qirg‘iziston (423,7 million dollar), Tojikiston (104 million dollari), Fransiya (44 million dollar) va Eron (6,1 million dollar). Qolgan 15 ta davlat bilan salbiy tashqi savdo balansi saqlanib qolmoqda.
Izoh (0)