Афғонистон Ислом партияси раҳбари ва сайловларда президентликка ўз номзодини қўйган Гулбеддин Ҳикматёр сайловларни қайта ўтказиш учун муваққат ҳукумат ташкил этишни таклиф қилди, деб ёзмоқда «Afghanistan.ru».
Кобулда ўтган матбуот анжуманида сиёсатчи сайловчиларнинг овоз беришда фаол бўлмагани ва биринчи турда ҳеч бир номзод президент сифатида сайланиш учун керакли миқдордаги овозларни тўплай олмаслигини маълум қилди.
Ҳикматёр номзодларнинг бирига 1 миллион атрофида биометрик бўлмаган сайлов варақалари ташланганлигини билдирди. Шунингдек, у боиметрик рўйхатга олиш тизими ишини нотўғри йўлга қўйгани ва сайловлар натижаларини эълон қилишда кечикгани учун Афғонистоннинг Мустақил сайлов комиссияси фаолиятини танқид қилди.
Ислом партияси етакчиси жаҳон ҳамжамиятига нисбатан ҳам танқидий фикрлар билдирди ва айрим хорижий дипломатларни сайловлар жараёнига аралашганликда айблади.
«Сайловлар халқ фикрини ҳурмат қиладиган ва сайлов кампанияси учун давлат ресурсларидан ўз манфаати йўлида фойдаланмайдиган холис ҳукумат назорати остида ўтиши лозим. Бундай инқироз ҳолатларини бартараф қилиш учун мамлакатда муваққат ҳукумат ташкил этиш лозим», — дея таъкидлаган Ҳикматёр.
Афғонистонда президентлик учун сайловлар сентябрь ойида ўтказилган ва уларда сайловчиларнинг овозини биометрик рўйхатга олиш тизимидан фойдаланилганди. Биометрик маълумотлар асосида овоз бериш жараёни ўтган йили парламент учун ўтказилган сайловларда синовдан ўтказилган ва овозлар сонини қалбакилаштиришнинг олдини олиш мақсадида президентлик сайловларида ҳам ушбу тизимдан фойдаланилганди.
Аммо бу сафар ҳам 2018 йилдаги каби биометрик ускуналардаги муаммо сабаб сайловнинг дастлабки натижаларини эълон қилиш кечикмоқда. Афғонистон мустақил сайлов комиссияси 19 октябрда ушбу кечикиш техник муаммолар сабаб кузатилганини эълон қилган ва сайловчилардан узр сўраган.
Мавзуга доир:
Изоҳ (0)