O‘zbekiston Liberal-demokratik partiyasi “Milliy tiklanish” partiyasini ko‘chirmachilikda ayblayotgani haqida O‘zAda maqola chop etildi. Unda O‘zLiDeP Siyosiy kengashi ijroiya qo‘mitasi kotibiyat mudiri Nuriddin Murodov bu borada o‘z fikrlarini bildirib o‘tgan.
Qayd etilishicha, “Milliy tiklanish” demokratik partiyasining ko‘chirmachiligi borasidagi gap-so‘zlar ijtimoiy tarmoqlarda ham “bolalab” ketdi. Xususan, Facebook’da saylov jarayoniga befarq bo‘lmagan foydalanuvchilardan biri Mardon Aslonov o‘z sahifasida “Milliy tiklanish” va Turkiya oq partiyasi saylovoldi jarayoni solishtirilgan suratlar joylagan. Suratda ushbu ikki partiya o‘rtasidagi o‘xshash jihatlar ko‘rsatilgan.
Nuriddin Murodov partiya raisining xohlagan davlat rahbarini o‘ziga kumir sifatida ko‘rishga haqi borligini inkor etib bo‘lmasligini tan olgan holda har bir mustaqil partiya o‘zining sof g‘oya va maqsadlariga ega bo‘lishini maqsadga muvofiq, deb hisoblaydi.
Shuningdek, uning ta’kidlashicha, “Milliy tiklanish” demokratik partiyasi O‘zLiDePning tayyor loyiha yoki taklifini o‘zlashtirib olmoqda.
Xususan, ushbu fraksiya kuni kecha “Tashqi mehnat migratsiyasi to‘g‘risida”gi qonun loyihasini ishlab chiqish haqida taklif bildirgan. Vaholanki, “Tashqi mehnat migratsiyasi to‘g‘risida”gi O‘zbekiston Respublikasi qonuni loyihasi O‘zLiDeP va tashqi mehnat migratsiyasi agentligi tomonidan allaqachon ishlab chiqilib, loyiha yuzasidan jamoatchilik muhokamasi davom etmoqda.
“Partiyaning bu va boshqa bir qator saylovoldi PR’ga harakatlari MTDPning ishongan hamda mustaqil tarzda ishlab chiqqan bir g‘oyasi yo‘qligini namoyon etgandi”, — deydi Nuriddin Murodov.
Bundan tashqari, shu yilning sentabr oyi boshlarida O‘zLiDeP delegatsiyasi Rossiyaga borgan. Tashrif doirasida O‘zbekistonning Rossiyadagi elchixonasi ko‘magida O‘zbekiston tarixida ilk bor mamlakat siyosiy partiyalaridan biri ushbu davlatda faoliyat yuritayotgan mehnat migrantlari bilan uchrashuv o‘tkazgan.
Oradan sal o‘tib MTDP ham Rossiyaning subyektlarida mehnat migrantlari bilan uchrashuvlar o‘tkazgan.
Lekin Nuriddin Murodovning aytishicha, Rossiyaga yuborilgan partiya delegatsiyasining rahbarlaridan biri aynan ushbu partiyada targ‘ibotga, aniqrog‘i faqat PR masalalariga mutasaddi odam bo‘lgan va safar tafsilotlarini yoritishda o‘ziga xosliklar kuzatilgan.
O‘zLiDeP esa o‘zining bu boradagi ishlarini hisobot tarzida faqatgina “XXI asr” ijtimoiy-siyosiy gazetasida chop etgan xolos.
“Xulosa o‘rnida shuni aytmoqchi edikki, MTDP fraksiyasini quyi palatada “Demokratik kuchlar blok”idagi kelishuvimizga ko‘ra, kam a’zoli bo‘lsa-da, bir sherigimiz sifatida ko‘rib, takliflarimizga ham sherik bo‘lishlariga unchalik qarshiligimiz yo‘q. Lekin, tashqi va ichki ko‘chirmachilikka haddan ziyod berilib ketish ‘Ijtimoiy fikr’ markazining ma’lumotlari yaqqol namoyon etgan shundog‘am katta bo‘lmagan obro‘lariga battar putur yetkazmasin deymiz”, — deya so‘zlarini yakunlagan O‘zLiDeP Siyosiy kengashi ijroiya qo‘mitasi kotibiyat mudiri.
Izoh (0)