Ўзбекистон Либерал-демократик партияси «Миллий тикланиш» партиясини кўчирмачиликда айблаётгани ҳақида ЎзАда мақола чоп этилди. Унда ЎзЛиДеП Сиёсий кенгаши ижроия қўмитаси котибият мудири Нуриддин Муродов бу борада ўз фикрларини билдириб ўтган.
Қайд этилишича, «Миллий тикланиш» демократик партиясининг кўчирмачилиги борасидаги гап-сўзлар ижтимоий тармоқларда ҳам «болалаб» кетди. Хусусан, Facebook’да сайлов жараёнига бефарқ бўлмаган фойдаланувчилардан бири Мардон Аслонов ўз саҳифасида «Миллий тикланиш» ва Туркия оқ партияси сайловолди жараёни солиштирилган суратлар жойлаган. Суратда ушбу икки партия ўртасидаги ўхшаш жиҳатлар кўрсатилган.
Нуриддин Муродов партия раисининг хоҳлаган давлат раҳбарини ўзига кумир сифатида кўришга ҳақи борлигини инкор этиб бўлмаслигини тан олган ҳолда ҳар бир мустақил партия ўзининг соф ғоя ва мақсадларига эга бўлишини мақсадга мувофиқ, деб ҳисоблайди.
Шунингдек, унинг таъкидлашича, «Миллий тикланиш» демократик партияси ЎзЛиДеПнинг тайёр лойиҳа ёки таклифини ўзлаштириб олмоқда.
Хусусан, ушбу фракция куни кеча «Ташқи меҳнат миграцияси тўғрисида»ги қонун лойиҳасини ишлаб чиқиш ҳақида таклиф билдирган. Ваҳоланки, «Ташқи меҳнат миграцияси тўғрисида»ги Ўзбекистон Республикаси қонуни лойиҳаси ЎзЛиДеП ва ташқи меҳнат миграцияси агентлиги томонидан аллақачон ишлаб чиқилиб, лойиҳа юзасидан жамоатчилик муҳокамаси давом этмоқда.
«Партиянинг бу ва бошқа бир қатор сайловолди ПР’га ҳаракатлари МТДПнинг ишонган ҳамда мустақил тарзда ишлаб чиққан бир ғояси йўқлигини намоён этганди», — дейди Нуриддин Муродов.
Бундан ташқари, шу йилнинг сентябрь ойи бошларида ЎзЛиДеП делегацияси Россияга борган. Ташриф доирасида Ўзбекистоннинг Россиядаги элчихонаси кўмагида Ўзбекистон тарихида илк бор мамлакат сиёсий партияларидан бири ушбу давлатда фаолият юритаётган меҳнат мигрантлари билан учрашув ўтказган.
Орадан сал ўтиб МТДП ҳам Россиянинг субъектларида меҳнат мигрантлари билан учрашувлар ўтказган.
Лекин Нуриддин Муродовнинг айтишича, Россияга юборилган партия делегациясининг раҳбарларидан бири айнан ушбу партияда тарғиботга, аниқроғи фақат ПР масалаларига мутасадди одам бўлган ва сафар тафсилотларини ёритишда ўзига хосликлар кузатилган.
ЎзЛиДеП эса ўзининг бу борадаги ишларини ҳисобот тарзида фақатгина «XXI аср» ижтимоий-сиёсий газетасида чоп этган холос.
«Хулоса ўрнида шуни айтмоқчи эдикки, МТДП фракциясини қуйи палатада «Демократик кучлар блок»идаги келишувимизга кўра, кам аъзоли бўлса-да, бир шеригимиз сифатида кўриб, таклифларимизга ҳам шерик бўлишларига унчалик қаршилигимиз йўқ. Лекин, ташқи ва ички кўчирмачиликка ҳаддан зиёд берилиб кетиш ‘Ижтимоий фикр’ марказининг маълумотлари яққол намоён этган шундоғам катта бўлмаган обрўларига баттар путур етказмасин деймиз», — дея сўзларини якунлаган ЎзЛиДеП Сиёсий кенгаши ижроия қўмитаси котибият мудири.
Изоҳ (0)