Respublika o‘quv-tarbiya muassasalari faoliyatini tashkil etish chora-tadbirlari to‘g‘risida Hukumat qarori qabul qilindi. Bu haqda Adliya vazirligi xabar berdi.
Qaror bilan Respublika o‘quv-tarbiya muassasalari to‘g‘risida nizom tasdiqlandi.
Nizomga muvofiq, alohida sharoitda tarbiyalash va ta’lim berishga muhtoj bo‘lgan bolalar uchun o‘g‘il bolalar va qiz bolalar o‘quv-tarbiya muassasalarining maqomi, vazifalari va faoliyatini tashkil etish tartibi belgilandi.
Ushbu muassasalarning asosiy vazifalaridan biri tarbiyalanuvchilarni davlat ta’lim standartlari asosida majburiy umumiy o‘rta ta’lim olishlari uchun shart-sharoitlar yaratishdan iborat.
Muassasalarga 14-18 yoshdagi tarbiyasi og‘ir voyaga yetmaganlar sud qarori asosida joylashtiriladi.
Tarbiyalanuvchilar muassasalarda axloqan tuzalguniga qadar, lekin uch yildan ortiq bo‘lmagan muddatda bo‘ladi.
Qaror bilan, ushbu muassasalar tarbiyalanuvchilarini oziq-ovqat, kiyim-kechak, poyabzal va boshqa buyumlar bilan ta’minlash me’yorlari ham tasdiqlangan.
Ma’lumot uchun, Respublika o‘g‘il bolalar o‘quv-tarbiya muassasasi hamda Respublika qiz bolalar o‘quv-tarbiya muassasasi Prezidentning 2019-yil 29-maydagi qarori bilan tegishli maktab-internatlar negizida tashkil etilgan.
Izoh (0)