O‘zbekistonda aholi uchun allergopasport shakllarini yaratish bo‘yicha qonun loyihasini ishlab chiqish rejalashtirilgan. Bu haqda Sog‘liqni saqlash vazirligi Toshkentda bo‘lib o‘tayotgan bolalar allergologlarining I Xalqaro ilmiy-amaliy anjumani yuzasidan bergan xabarida ma’lum qilgan.
Qayd etilishicha, qonun loyihasiga mutaxassislar uchun molekulyar allergologiya bo‘yicha maktablar o‘tkazish, bemorlar va ularning ota-onalari uchun esa o‘quv dasturlarini ishlab chiqish, doimiy ravishda aholi uchun seminarlar, yirik aksiyalar o‘tkazish, shuningdek, oziq-ovqat allergenlari molekulalarini aniqlash masalalarini kiritish ham rejalashtirilgan.
Jahon Sog‘liqni saqlash tashkiloti ma’lumotlariga ko‘ra, dunyo aholisining 40 foizi allergik kasalliklarga chalingan. Ushbu ko‘rsatkichning muayyan qismini bolalar va o‘smirlar tashkil etadi.
Xabar berilishicha, O‘zbekistonda bugungi kunda 150 nafarga yaqin allergolog shifokor faoliyat ko‘rsatmoqda. Prezidentning 2018-yil 11-mayda qabul qilingan “Allergik kasalliklarni profilaktika qilish, ularga tashxis qo‘yish va davolashni tubdan takomillashtirish chora-tadbirlari to‘g‘risida”gi qarori sohada islohotlarni boshlab bergan.
Mazkur qaror bilan Respublika ilmiy-ixtisoslashgan allergologiya markazining vazifalari va faoliyat yo‘nalishlari kengaygan. Aholi orasida allergik kasalliklar bilan kasallanishni aniqlash maqsadida markaz tomonidan doimiy populyatsion epidemiologik tekshiruvlar o‘tkazib boriladi.
Respublikada allergik kasalliklarni erta aniqlash uchun 18 yoshga to‘lmagan va xavf ostida bo‘lgan bolalar orasida joriy yil yanvar—iyul oylarida Bolalar allergologiyasi va klinik immunologiyasi sohasida bir martalik umumdavlat aksiyasi o‘tkazilgan. Aksiya uch bosqichda olib borilgan.
Mazkur sohada kadrlar tayyorlash va malakasini oshirishga ham alohida e’tibor qaratilmoqda, deyiladi xabarda. Xususan, 2019-yildan boshlab allergologlarning malakasini oshirish va qayta ixtisoslashtirish Respublika ilmiy-ixtisoslashtirilgan allergologiya markazi zimmasiga yuklatilgan.
Allergologiya sohasidagi ilmiy-diagnostik, ta’lim, innovatsion ishlab chiqarishni rivojlantirish, xorijiy yetakchi mutaxassislarni jalb etish, shuningdek, allergik kasalliklarni tashxislash va davolashga molekulyar va boshqa ilg‘or usullarni joriy etgan holda ko‘rsatilayotgan tibbiy xizmatlar sifatini yanada oshirish maqsadida Toshkentda Molekulyar allergologiya xalqaro markazi tashkil etilgan.
Izoh (0)