Республика ўқув-тарбия муассасалари фаолиятини ташкил этиш чора-тадбирлари тўғрисида Ҳукумат қарори қабул қилинди. Бу ҳақда Адлия вазирлиги хабар берди.
Қарор билан Республика ўқув-тарбия муассасалари тўғрисида низом тасдиқланди.
Низомга мувофиқ, алоҳида шароитда тарбиялаш ва таълим беришга муҳтож бўлган болалар учун ўғил болалар ва қиз болалар ўқув-тарбия муассасаларининг мақоми, вазифалари ва фаолиятини ташкил этиш тартиби белгиланди.
Ушбу муассасаларнинг асосий вазифаларидан бири тарбияланувчиларни давлат таълим стандартлари асосида мажбурий умумий ўрта таълим олишлари учун шарт-шароитлар яратишдан иборат.
Муассасаларга 14-18 ёшдаги тарбияси оғир вояга етмаганлар суд қарори асосида жойлаштирилади.
Тарбияланувчилар муассасаларда ахлоқан тузалгунига қадар, лекин уч йилдан ортиқ бўлмаган муддатда бўлади.
Қарор билан, ушбу муассасалар тарбияланувчиларини озиқ-овқат, кийим-кечак, поябзал ва бошқа буюмлар билан таъминлаш меъёрлари ҳам тасдиқланган.
Маълумот учун, Республика ўғил болалар ўқув-тарбия муассасаси ҳамда Республика қиз болалар ўқув-тарбия муассасаси Президентнинг 2019 йил 29 майдаги қарори билан тегишли мактаб-интернатлар негизида ташкил этилган.
Изоҳ (0)