ShHT mamlakatlari hamkorlikda terrorchilik guruhlarining 6 mingdan ortiq a’zosini yagona ro‘yxatga kiritdi
Shanxay Hamkorlik Tashkiloti Mintaqaviy antiterror tuzilmalarining yangona qidiruv reyestriga jinoyat sodir etgan yoki ekstremizm va terrorizmda gumonlangan 6600 dan ortiq kishi kiritildi. Bu haqda “Gazeta.uz” xabar berdi.
ShHT Mintaqaviy antiterror tuzilmalarining ijrochi direktori Jumaxon G‘iyosov 15—17-oktabr kunlari Rossiya Federal xavfsizlik xizmatining hamkorlari bo‘lgan maxsus xizmatlar va xavfsizlik organlari rahbarlarining Sochi shahrida bo‘lib o‘tgan yig‘ilishida ishtirok etdi.
Jumaxon G‘iyosovning ma’lum qilishicha, ShHT Mintaqaviy antiterror tuzilmalari ishining asosiy muhim yo‘nalishlaridan biri terroristik va ekstremistik faoliyatga aloqador bo‘lgan fuqarolarning qidiruvini amalga oshirishda hamkorlik qilishdan iborat. Bu vazifani amalga oshirishga ko‘maklashish maqsadida ShHT Mintaqaviy antiterror tuzilmalari ijroiya qo‘mitasi tomonidan yagona qidiruv reyestri tuzilgan bo‘lib, doimiy ravishda yangilab boriladi. Ro‘yxatga 6600 dan ortiq yuqorida ko‘rsatilgan toifalarga kiruvchi shaxslar kiritilgan.
Ijroiya qo‘mita rahbarining qayd etishicha, ShHT mamlakatlari maxsus xizmatlari o‘rtasida ma’lumot almashish maqsadida xorijiy jangari terrorchilarni ro‘yxatga olish jadvali ishlab chiqilgan va jadvalga 4500 dan ortiq shaxsning ma’lumotlari kiritilgan.
Mintaqaviy antiterror tuzilmalari tomonidan 115 dan ortiq terroristik, separatistik va ekstremistik tashkilotning ro‘yxati tuzilgan. Ro‘yxatdagi tashkilotlarning faoliyati ShHTga a’zo davlatlar hududida taqiqlangan. Xususan, ro‘yxatga “Al-Qoida”, IShID, “Sharqiy Turkiston Islom harakati”, “Hizb-ut Tahrir al-Islomiy”, “Turkiston islom qayta tiklanishi partiyasi” kirgan.
2018-yilda ShHT mamlakatlari maxsus xizmatlari tomonidan 600 nafar terrorchi va ekstremist qo‘lga olingan, shuningdek, 360 tadan ortiq tayyorlanayotgan terakt va diniy-ektremistik xarakterdagi jinoyat bartaraf qilingan. Tezkor tadbirlar davomida 170 tadan ortiq qo‘lbola portlovchi qurilmalar olib qo‘yilgan, terroristik va ekstremistik mazmunga ega 165 mingdan ortiq internet resursiga kirish cheklangan.
