Hindiston agar MMBTU uchun 10 AQSh dollari va ming kubometri uchun 350 dollar bo‘lgan TAPI gaz quvuridagi turkman gazining narxi arzonlashmasa, uni sotib olmasligini ma’lum qildi.
Xabarga ko‘ra, ayni vaqt Osiyoda gaz narxi ming kubometr uchun 230 AQSh dollariga teng. Ismini oshkor etmagan hindistonlik amaldorning aytishicha, Turkmanistondan xarid qilinadigan gaz amerikaning siqilgan gazidan deyarli ikki baravar qimmatga tushadi.
Ekspertlar TAPI Hindistonni MMBTU uchun 4 dollar (ming kubometri uchun 140 dollar) bo‘lgan taqdirdagina qiziqtirishi mumkinligini bildirmoqda. Hindlar ushbu narxning keyingi 30 yil uchun o‘zgarmay turishini shartnoma orqali tasdiqlab qo‘ymoqchi. Agar ushbu kelishuv amalga oshsa, Hindiston yiliga 3 mlrd AQSh dollarini iqtisod qiladi.
Ayni vaqtda Turkmaniston va Hindiston o‘rtasidagi muzokaralarda kelishuvga erishilgani yo‘q.
Hindistonni turkman gazining narxidan tashqari Pokistonning o‘z maqsadi yo‘lida TAPIdan foydalanishi mumkinligi va nizo kelib chiqqan vaqtda hukumatga bosim o‘tkazishidan ham xavotirda.
“Shu sababli Dehlining bunday sharoitlarda gaz quvurining qurilishida ishtirok etmasligining ehtimoli yuqori. Bu yerda “lekin” va “agarda” bilan boshlanuvchi shartlar ko‘p”, — deya ta’kidlagan amaldor.
7-oktabrda Pokistonda TAPI loyihasiga ajratilgan 250 million AQSh dollari o‘zlashtirilgani xabar qilingan. Pokistonning Inter State Gas Systems Ltd. (ISGS) gaz kompaniyasi boshqaruvchisi Mobin Saulat jinoyatni amalga oshirganlikda ayblanmoqda. Afg‘oniston iqtisodiyot vaziri Mustafo Mastur TAPI quvurini qurish va ishga tushirish uchun 12 milliard AQSh dollari miqdoridagi mablag‘ zarurligini bildirgan. Turkmaniston ushbu mablag‘ni ajratishga tayyorligini ma’lum qilgan, keyinchalik iqtisodiy inqiroz sabab investitsiya jalb qilish imkoniyati yo‘qligi oshkor bo‘ldi.
8-oktabrda Turkmaniston TIV Pokistonning yuqori martabali harbiy amaldori bilan uchrashuv o‘tkazgan. Muzokaralar davomida tomonlar TAPI loyihasi borasida fikr almashgan. Uchrashuvda gaz quvuri yoki harbiy masalalar muhokama etilganligi haqida ma’lumot berilmagan.
13-oktabr, yakshanba kuni Pokiston gaz quvuri loyihasining kechikayotgani sabab Turkmanistonga ushbu masalani muhokama qilish uchun delegatsiya yuborilishini xabar qilgan.
Izoh (0)