Ҳиндистон агар MMBTU учун 10 АҚШ доллари ва минг кубометри учун 350 доллар бўлган ТАПИ газ қувуридаги туркман газининг нархи арзонлашмаса, уни сотиб олмаслигини маълум қилди.
Хабарга кўра, айни вақт Осиёда газ нархи минг кубометр учун 230 АҚШ долларига тенг. Исмини ошкор этмаган ҳиндистонлик амалдорнинг айтишича, Туркманистондан харид қилинадиган газ американинг сиқилган газидан деярли икки баравар қимматга тушади.
Экспертлар ТАПИ Ҳиндистонни MMBTU учун 4 доллар (минг кубометри учун 140 доллар) бўлган тақдирдагина қизиқтириши мумкинлигини билдирмоқда. Ҳиндлар ушбу нархнинг кейинги 30 йил учун ўзгармай туришини шартнома орқали тасдиқлаб қўймоқчи. Агар ушбу келишув амалга ошса, Ҳиндистон йилига 3 млрд АҚШ долларини иқтисод қилади.
Айни вақтда Туркманистон ва Ҳиндистон ўртасидаги музокараларда келишувга эришилгани йўқ.
Ҳиндистонни туркман газининг нархидан ташқари Покистоннинг ўз мақсади йўлида ТАПИдан фойдаланиши мумкинлиги ва низо келиб чиққан вақтда ҳукуматга босим ўтказишидан ҳам хавотирда.
«Шу сабабли Деҳлининг бундай шароитларда газ қувурининг қурилишида иштирок этмаслигининг эҳтимоли юқори. Бу ерда «лекин» ва «агарда» билан бошланувчи шартлар кўп», — дея таъкидлаган амалдор.
7 октябрда Покистонда ТАПИ лойиҳасига ажратилган 250 миллион АҚШ доллари ўзлаштирилгани хабар қилинган. Покистоннинг Inter State Gas Systems Ltd. (ISGS) газ компанияси бошқарувчиси Мобин Саулат жиноятни амалга оширганликда айбланмоқда. Афғонистон иқтисодиёт вазири Мустафо Мастур ТАПИ қувурини қуриш ва ишга тушириш учун 12 миллиард АҚШ доллари миқдоридаги маблағ зарурлигини билдирган. Туркманистон ушбу маблағни ажратишга тайёрлигини маълум қилган, кейинчалик иқтисодий инқироз сабаб инвестиция жалб қилиш имконияти йўқлиги ошкор бўлди.
8 октябрда Туркманистон ТИВ Покистоннинг юқори мартабали ҳарбий амалдори билан учрашув ўтказган. Музокаралар давомида томонлар ТАПИ лойиҳаси борасида фикр алмашган. Учрашувда газ қувури ёки ҳарбий масалалар муҳокама этилганлиги ҳақида маълумот берилмаган.
13 октябрь, якшанба куни Покистон газ қувури лойиҳасининг кечикаётгани сабаб Туркманистонга ушбу масалани муҳокама қилиш учун делегация юборилишини хабар қилган.
Изоҳ (0)