O‘zbekiston Xalq ta’limi vaziri Sherzod Shermatov va Rossiyaning O‘zbekistondagi elchisi Vladimir Tyurdenov rus tili fani bo‘yicha o‘qishni takomillashtirish, shuningdek, barcha maktablarga rus tili fan o‘qituvchilarini tayyorlash bo‘yicha hamkorlik imkoniyatlarini muhokama qildi. Bu haqda Xalq ta’limi vazirligi xabar berdi.
Qayd etilishicha, Xalq ta’limi vazirligida bo‘lib o‘tgan mazkur uchrashuvda ta’lim sohasidagi hamkorlikni kengaytirish zarurligi, O‘zbekistondagi barcha rus tili fani o‘qituvchilarini qayta tayyorlash uchun mamlakatga rossiyalik mutaxassislarni jalb qilishdan manfaatdor ekanligi ta’kidlandi.
Rossiyalik hamkorlarga mamlakat o‘qituvchilarining rus tilida bilimlarini sinab ko‘rish va natijalarga ko‘ra ularni qayta tayyorlash dasturini amalga oshirish taklifi berildi.
Shu bilan birga, tomonlar O‘zbekiston yoshlari uchun Rossiya universitetlarida pedagogika yo‘nalishida o‘qishni tashkil qilish masalasini ko‘rib chiqdi.
O‘zbekiston tomoni rossiyalik mutaxassislarni jalb qilgan holda ushbu sohadagi ta’lim sifatini oshiradigan o‘quv dasturlari va rus tilidagi darsliklarni qayta ko‘rib chiqishni taklif qildi.
Uchrashuvda O‘zbekistondagi barcha maktab bitiruvchilari kamida uchta tilni — davlat, rus va ingliz tillarini bilishi kerakligi ta’kidlandi.
Izoh (0)