Ўзбекистон Халқ таълими вазири Шерзод Шерматов ва Россиянинг Ўзбекистондаги элчиси Владимир Тюрденов рус тили фани бўйича ўқишни такомиллаштириш, шунингдек, барча мактабларга рус тили фан ўқитувчиларини тайёрлаш бўйича ҳамкорлик имкониятларини муҳокама қилди. Бу ҳақда Халқ таълими вазирлиги хабар берди.
Қайд этилишича, Халқ таълими вазирлигида бўлиб ўтган мазкур учрашувда таълим соҳасидаги ҳамкорликни кенгайтириш зарурлиги, Ўзбекистондаги барча рус тили фани ўқитувчиларини қайта тайёрлаш учун мамлакатга россиялик мутахассисларни жалб қилишдан манфаатдор эканлиги таъкидланди.
Россиялик ҳамкорларга мамлакат ўқитувчиларининг рус тилида билимларини синаб кўриш ва натижаларга кўра уларни қайта тайёрлаш дастурини амалга ошириш таклифи берилди.
Шу билан бирга, томонлар Ўзбекистон ёшлари учун Россия университетларида педагогика йўналишида ўқишни ташкил қилиш масаласини кўриб чиқди.
Ўзбекистон томони россиялик мутахассисларни жалб қилган ҳолда ушбу соҳадаги таълим сифатини оширадиган ўқув дастурлари ва рус тилидаги дарсликларни қайта кўриб чиқишни таклиф қилди.
Учрашувда Ўзбекистондаги барча мактаб битирувчилари камида учта тилни — давлат, рус ва инглиз тилларини билиши кераклиги таъкидланди.
Изоҳ (0)